პოლიტიკა

საქართველოს იტალიის საგარეო საქმეთა მინისტრი ეწვევა

6-7 ნოემბერს საქართველოს ოფიციალური ვიზიტით ეწვევა იტალიის საგარეო საქმეთა და საერთაშორისო თანამშრომლობის მინისტრი პაოლო ჯენტილონი. ის ევროკავშირის ქვეყნების მთავრობის მაღალის რანგის პირველი წარმომადგენელია, რომელიც საქართველოს არჩევნების შემდეგ ეწვევა. თბილისი კავკასიის რეგიონში მინისტრის მისიის პირველი ეტაპია (შემდეგი ეტაპები ბაქო და ერევანია), _ აცნობეს მედიანიუსს იტალიიის საელჩოდან

მინისტრი ჯენტილონი, თავის კოლეგასთან, მინისტრ მიხეილ ჯანელიძესთან ერთად განიხილავს უმნიშვნელოვანეს საერთაშორისო საკითხებს. ისინი ერთად იმსჯელებენ საჯარო ღონისძიებაზე “იტალია-საქართველოს პარტნიორობა და ევროპის მომავალი”. ღონისძიების პროგრამა ერთობლივად მომზადდა საქართველოს საგარეო საქმეთა სამინისტროს, იტალიის საელჩოსა და რონდელის ფონდის მიერ. ორი ქვეყნის საგარეო საქმეთა მინისტრები პატივს მიაგებენ ომში დაღუპულ გმირთა ხსოვნას. მინისტრი ჯენტილონი შეხვდება, აგრეთვე, პრემიერ მინისტრს გიორგი კვირიკაშვილს და პრეზიდენტს გიორგი მარგველაშვილს. მინისტრი ჯენტილონი საქართველოს იუსტიციის მინისტრთან თეა წულუკიანთან ერთად ინახულებს თბილისის იუსტიციის სახლს.

დღის წესრიგშია ორმხრივ ურთიერთობებთან (რომლებიც მოიცავს პოლიტიკურ, ეკონომიკურ, კულტურულ და სამეცნიერო თანამშრომლობას) და რეფორმებისა და ევრო-ატლანტიკური ინტეგრაციისაკენ საქართველოს სვლასთან დაკავშირებული საკითხები და რეგიონული საკითხები.