პოლიტიკა

საქართველოს იმიჯის სერიოზული პრობლემა აქვს ევროპაში - სალომე სამადაშვილი

„ერთიანი ნაციონალური მოძრაობის“ წევრის, სალომე სამადაშვილის განცხადებით, საქართველოს პრობლემები აქვს იმიჯის თვალსაზრისით ევროპაში. ამის შესახებ მან საგარეო ურთიერთობათა და ევროპასთან ინტეგრაციის კომიტეტების გაერთიანებული სხდომაზე განაცხადა, სადაც საგარეო საქმეთა და შს მინისტრების მოადგილეებს უსმენენ.

„ვფიქრობ, ყველას გვესმის, რომ ვიდრე ამ ქვეყანაში საარჩევნო სისტემაზე იწერება საერთაშორისო ანგარიშები, რომელშიც საუბარია იმაზე, რომ კრიმინალური ქსელები მონაწილეობენ არჩევნების ადმინისტრაციის საქმიანობაში, ამ ქვეყანას ექნება პრობლემა, როგორც ქვეყანას, რომელსაც აქვს კრიმინალის პრობლემა. ამ ქვეყანას იქამდე ექნება პრობლემა აქედან გაქცეული ადამიანების, როდესაც ხელისუფლების წარმომადგენლები აკეთებენ უპასუხისმგებლო განცხადებებს, როცა ქუჩაში ადგილი აქვს ექსტრემისტული ჯგუფების მიერ ძალადობის განხორციელებას და ამაზე არ არის ადეკვატური რეაგირება. მაინტერესებს ე.წ. „ქართული მარშისა“ და სხვა ძალადობრივი ჯგუფების ქმედებები რამდენად აისახება თავშესაფრის მაძიებელი ადამიანების მდგომარეობის განხილვისას.

ამ ქვეყანას აქვს იმიჯის სერიოზული პრობლემა ევროპაში. ვფიქრობ, უვიზო რეჟიმის პრობლემა უკავშირდება სწორედ იმას, რომ ჩვენი ქვეყნის იმიჯი ევროპაში არ არის ადეკვატური და ამ დროს ჩვენ ვხედავთ, რომ ხელისუფლება ხარჯავს მილიონ-ნახევარ დოლარს, რომ გასწიოს რეკლამა ერთ-ერთ რუსულ არხზე. ეს ხდება იმ ფონზე, როცა არარუსულ საინფორმაციო წყაროებში გასულ რეკლამაზე სულ დახარჯულია 3 მლნ. დოლარი“, - განაცხადა სამადაშვილმა.