პოლიტიკა

საქართველოს ევროატლანტიკური ინტეგრაციის კურსი არავის წინააღმდეგ მიმართული არ არის - ქეთევან ციხელაშვილი

საქართევლოს შერიგებისა და სამოქალაქო თანასწორობის საკითხებში სახელმწიფო მინისტრის ქეთევან ციხელაშვილის განცხადებით, საქართველოს ევროპული განვითარებისა და ევროატლანტიკური ინტეგრაციის კურსი არის ქვეყნის სასიცოცხლო ინტერესი.

ამის შესახებ ციხელაშვილმა, რუსეთის საგარეო საქმეთა მინისტრის მოადგილის გრიგორი კარასინის მეირ გაკეთებული განცხადების კომენტირებისას განაცხადა,რომლის მიხედვით, საქართველო-ნატოს თანამშრომლობა ისეთ ფორმებს იძენს, რომ თბილისს ნატოს იმ პოლიტიკის მონაწილად ხდის, რომელიც რუსეთის შეკავებას გულისხმობს.

ქეთევან ციხელაშვილმა აღნიშნა, რომ საქართველოს ევროატლანტიკური კურსი არავის წინააღმდეგ მიმართული არ არის.

„თუ იგულისხმება იმ პოლიტიკის შეკავება, რომელსაც სამწუხაროდ, რუსეთი წლების განმავლობაში მეზობელ სახელმწიფოებში, მათ შორის, საქართველოში ახორციელებს, ვგულისხმობ, ჩვენი ტერიტორიების ოკუპაციას, რა თქმა უნდა ეს ასეც შეიძლება იყოს განხილული. თუმცა კიდევ ერთხელ და ხაზგასმით ვამბობ, რომ საქართველოს ევროპული განვითარების კურსი, ევროატლანტიკური ინტეგრაციის კურსი, რეფორმების ის ძალიან მნიშვნელოვანი ტალღა, რომელსაც ახორციელებს ქვეყანა იმისთვის რომ გახდეს დემოკრატიული, სტაბილური, ჰქონდეს მყარი განვითარების, მათ შორის ეკონომიკური განვითარების შესაძლებლობა -ეს არის ქვეყნის სასიცოცხლო ინტერესი და კიდევ ერთხელ ვამბობ, არ არის მიმართული არავის წინააღმდეგ“,-აღნიშნა მინისტრმა.

მონიკა დავლიანიძე