პოლიტიკა

საქართველოს დღეს, ესტონეთის პრეზიდენტი ეწვევა

საქართველოში, დღეს სახელმწიფო ვიზიტით ესტონეთის პრეზიდენტი კერსტი კალიულაიდი, მეუღლესთან გეორგ-რენემაქსიმოვსკისთან ერთად ესტუმრება.

კერსტი კალიულაიდის სახელმწიფო დელეგაცია ახლავს, რომლის შემადგენლობაში ესტონეთის სახელმწიფო უწყებების პირველი პირები და ბიზნესმენები იქნებიან.

ესტონეთის პრეზიოდენტის დახვედრის ოფიციალური ცერემონია საქართველოს პრეზიდენტის სასახლეში დღეს გაიმართება, რის შემდეგაც ესტონეთისა და საქართველოს პრეზიდენტები შეხვედრებს გამართავენ პირისპირ და გაფართოებულ ფორმატში. ამის შემდეგ კი პრო ქვეყნის პრეზიდენტი მედიის კითხვებს უპასუხებს.

გარდა ამისა, კერსტი კალიულაიდი საქართველოს პრემიერ-მინისტრ გიორგი კვირიკაშვილს შეხვდება და ქართულ-ესტონურ ბიზნესფორუმში მიიღებს მონაწილეობას.

ესტონეთის პრეზიდენტის სახელმწიფო ვიზიტის ფარგლებში, იგეგმება ასევე შეხვედრები საქართველოს კათოლიკოს-პატრიარქ ილია მეორესთან და საქართველოს პარლამენტის თავმჯდომარე ირაკლი კობახიძესთან.

საქართველოსა და ესტონეთის პრეზიდენტები ხურვალეთის ადმინისტრაციულ სასაზღვრო ზოლს ესტუმრებიან.

კერსტი კალიულაიდი წეროვნის საჯარო სკოლასაც ეწვევა.

კერსტი კალიულაიდი ქუთაისში აკაკი წერეთლის სახელობის სახელმწიფო უნივერსიტეტში საჯარო ლექციას წაიკითხავს და ესტონური პროექტის ხელშეწყობით დაარსებულ კომპიუტერულ კლასს მოინახულებს. ესტონეთის პრეზიდენტი, მეუღლესთან ერთად, სახელმწიფო ვიზიტის კულტურული პროგრამის ფარგლებში, თბილისს, მცხეთასა და იმერეთის რეგიონს დაათვალიერებს.

მონიკა დავლიანიძე