პოლიტიკა

საქართველოს ადგილმდებარეობა ისლამისტმა მებრძოლეებმა შეიძლება გამოიყენონ ძალების აღსადგენად - ელენა პომოკოვა

სტრატეგიული უსაფრთხოების ცენტრმა გამართა შეხვედრა, სადაც განიხილეს რადიკალური ექსტრემიზმის საფრთხე. ასევე იქ იმსჯელეს სტრატეგიაზე, რომლის საჭიროება დადგა ტერორისტული ორგანიზაცია „ისლამური სახელმწიფოს“ დამარცხების შემდეგ, კერძოდ, მისი მებრძოლეების მშობლიურ ქვეყნებში დაბრუნების გამო.

უსაფრთხოების საკითხებში ექსპერტის, ელენა პომოკოვას განცხადებით, სუს-მა ყურადღება უნდა გაამახვილოს სირიიდან დაბრუნებულ რადიკალებზე, რადგან მათ შესაძლოა, აჰმედ ჩატაევივით საფრთხე შეუქმნან საქართველოს.

ექსპერტის შეფასებით, უმჯობესია, სახელმწიფომ ასეთ ადამიანებს დახმარება გაუწიოს.

„საქართველოს მდებარეობა ჩრდილოეთ კავკასიასა და თურქეთს შორის ისლამისტი მებრძოლების მიერ შესაძლოა გამოყენებული იყოს, როგორც უსაფრთხო ტერიტორია ძალების აღსადგენად. სწორედ ასეთ ადამიანებს უნდა დაუთმოს საქართველოს უსაფრთხოების სამსახურმა განსაკუთრებული ყურადღება, რადგან მათ შესაძლოა, აჰმედ ჩატაევის მსგავსად საფრთხე შეუქმნან ქვეყანას.

არ ვთვლი, რომ პანკისის ხეობა მებრძოლებისთვის სატრანზიტო ზონაა, რადგან აქედან ჩრდილოეთ კავკასიაში გადასვლა რთულია, თუმცა არ უნდა გამოვრიცხოთ, რომ სირიიდან და ერაყიდან ჩამოსული ადამიანები დაბრუნდნენ პანკისში, რადგან ეს მათი სახლია. შესაძლოა, ეს პირები „ISIS“-ით გულაცრუებულები არიან და სურთ, ძველ ცხოვრებას დაუბრუნდნენ, ასეთ ადამიანებს ყველაზე მეტად სჭირდება დახმარება ხელისუფლებასა და საზოგადოების მხრიდან“,- უთხრა პომოკოვამ „რუსთავი 2“-ს.

საქართველოს უსაფრთხოებისა და განვითარების ცენტრის გამგეობის წევრის, გიორგი გოგუაძის განცხადებით, სამშობლოში დაბრუნებული რადიკალების რეაბილიტაცია უნდა მოხდეს.

„მთავარი არის ის, რომ ხისტი ძალა არ შეიძლება იყოს ერთადერთი გამოსავალი. ჩვენ უნდა ვიზრუნოთ, რომ ჩვენი მოქალაქეების დერადიკალიზაცია მოხდეს და ისინი იყვნენ კვლავ ჩვენი საზოგადოების წევრები“, - თქვა გოგუაძემ.