პოლიტიკა

საქართველომ ყველაფერი უნდა გააკეთოს, რათა თავი დაიცვას - ბენ ჰოჯესი

გადამდგარი გენერალ-ლეიტენანტის, ევროპაში აშშ-ის არმიის ყოფილი მთავარსარდლის ბენ ჰოჯესის განცხადებით, საქართველომ ყველაფერი უნდა გააკეთოს რუსეთისგან საკუთარი თავის დასაცავად, მათ შორის ითანამშრომლოს თავის მოკავშირეებთან შავი ზღვის რეგიონშიც. ამის შესახებ ჰოჯესმა 2008 წლის ომის მე-10 წლისთავის თემაზე „ამერიკის ხმასთან“ ინტერვიუში ისაუბრა.

მისივე თქმით, თუკი საქართველოში დემოკრატია შესუსტდება, ამას რუსეთი აუცილებლად გამოიყენებს.

„ჩვენ ყველა ვართ რუსეთთან სავარაუდო კონფლიქტის საფრთხის წინაშე. ეს შეიძლება სხვადასხვა ფორმით გამოიხატოს – იყოს კინეტიკური, კიბერსივრცეში, იყოს თავდასხმა ჩვენს ინსტიტუტებზე. იცით, რა მოხდა 2016 წელს ჩვენს არჩევნებზე. ეს ყველაფერი რუსეთისგან უწყვეტი ზეწოლის ქვეშაა. თვალები ყველას ფართოდ უნდა გვქონდეს გახელილი. აქ შვეიცარიაზე არ ვსაუბრობთ – ლაპარაკია რუსეთზე. საფრთხე ყველას გვემუქრება, თუ არ ვართ მომზადებული, არ ვართ ძლიერები და თუ მათ მკაფიოდ არ ვუთხარით, რომ რაღაცები ჩვენთვის მიუღებელია. საქართველომ ყველაფერი უნდა გააკეთოს, რათა თავი დაიცვას. უნდა გააგრძელოს იყოს მოუნელებელი და ამის გასაკეთებლად ახლოს უნდა ითანამშრომლოს მოკავშირეებთან, მათ შორის, შავი ზღვის რეგიონში. ამაში შედის ინფორმაციის, დაზვერვის, შესაძლებლობების გაზიარება. ქვეყნის შიგნით კი, თუ არსებობს კორუფცია, თუ ხალხი მთავრობას არ ენდობა, თუ მედიას საკუთარი საქმის კეთების საშუალება არ ეძლევა და თუ ლიბერალური დემოკრატიის ძირითადი პრინციპები არ მუშაობს, რუსეთი ამას გამოიყენებს“, – თქვა ჰოჯესმა.