პოლიტიკა

საქართველო სამშვიდობო პოლიტიკით ამტკიცებს, რომ არის ქვეყანა, რომლის პოლიტიკა არ არის ვინმეს წინააღმდეგ მიმართული - ქეთევან ციხელაშვილი

შერიგებისა და სამოქალაქო თანასწორობის საკითხებში სახელმწიფო მინისტრი ქეთევან ციხელაშვილი გამოეხმაურა რუსეთის საგარეო უწყების ოფიციალური წარმომადგენლის, მარია ზახაროვას განცხადებას, რომლის თანახმად, „საქართველოს ნატო-ში გაწევრიანებას თავისი შედეგები მოჰყვება“.

ციხელაშვილის თქმით, ასეთი მიდგომა სამწუხაროა, რადგან საქართველომ თავისი სამშვიდობო პოლიტიკით დაამტკიცა, რომ ის არავის წინააღმდეგ არაა მიმართული.

„ამ მიდგომებში ახალი არაფერია და ძალიან სამწუხაროა, რადგან საქართველო თავისი პოლიტიკით ბოლო წლების განმავლობაში, მათ შორის, სამშვიდობო პოლიტიკით, მისი განვითარების კურსით ამტკიცებს, რომ არის ქვეყანა, რომლის პოლიტიკა არ არის ვინმეს წინააღმდეგ მიმართული.

ჩვენი ევროპული და ევროატლანტიკური ინტეგრაცია არის მხოლოდ იმისთვის, რომ ჩვენ ქვეყანას ჰქონდეს შეუფერხებელი განვითარების შესაძლებლობა, უსაფრთხო გარემო. დემოკრატიული ინსტიტუტების მშენებლობის შესაძლებლობა და ეკონომიკური კეთილდღეობა. ამიტომ, ძალიან მნიშვნელოვანია, რომ ამ მიმართულების ერთგულებით ვამტკიცებთ, რომ ჩვენ ვართ დასავლელი პარტნიორების საიმედო პარტნიორი რეგიონში და მომავალშიც გავაგრძელებთ ამ მიმართულებით სვლას“, – განაცხადა ციხელაშვილმა.