პოლიტიკა

საქართველო იყო და რჩება აშშ-ის მთავარ მოკავშირედ რეგიონში - გიორგი კვირიკაშვილი

დღეს გამართულ მთავრობის სხდომაზე საქართველოს პრემიერ მინისტრმა გიორგი კვირიკაშვილმა განაცხადა, რომ საქართველო იყო და რჩება აშშ-ის მთავარ მოკავშირედ რეგიონში.

მან კიდევ ერთხელ მიულოცა დონალდ ტრამპს აშშ-ის ახალ პრეზიდენტად არჩევა და იმედი გამოთქვა, რომ ორ ქვეყანას შორის არსებული სტრატეგიული ურთიერთობები გაფართოვდება.

„საქართველო იყო და რჩება რეგიონში აშშ-ის ერთგულ და მნიშვნელოვან პარტნიორად. ჩვენ გვაქვს ინსტიტუციონალიზებული, სტრატეგიული ურთიერთობის ფორმატი, რომელიც მოიცავს არაერთ მიმართულებას: თავდაცვა და უსაფრთხოება; ეკონომიკა, ვაჭრობა და ენერგეტიკა; დემოკრატიული განვითარება და ხალხთაშორისი ურთიერთობები. ამ ქარტიის ფარგლებში საქართველო გააგრძელებს ძალიან მჭიდრო თანამშრომლობას ამერიკის შეერთებულ შტატებთან იმისათვის, რომ ორმხრივად ხელსაყრელი შედეგები მივიღოთ და ძალიან დიდი იმედი გვაქვს თანამშრომლობის დადებითი შედეგების. საქართველოს დამოუკიდებლობის მოპოვების პირველივე დღიდან, აშშ იყო და დღემდე არის საქართველოს სუვერენიტეტისა და ტერიტორიული მთლიანობის ძლიერი მხარდამჭერი და ჩვენი უმთავრესი პარტნიორი,“- განაცხადა პრემიერმა.

ანა მებურიშვილი