პოლიტიკა

საქართველო არის პრიორიტეტი ამერიკის შეერთებული შტატებისთვის - იან კელი

საქართველოში აშშ-ის ელჩის, იან კელის განცხადებით, აშშ დაინტერესებულია საქართველოსთან თავისუფალი ვაჭრობით და ტრამპის ადმინისტრაცია ამაზე მუშაობს.

„ამ მიმართულებით ბევრი რამ ხორციელდება. ტრამპის ადმინისტრაციის მხრიდან გამოიხატება, რომ ის სწავლობს, თუ რა გზით შეიძლება დაეხმაროს საქართველოს ეკონომიკის რეფორმირებას. მიუხედავად იმისა, რომ ჯერ ადმინისტრაცია ახალი დაკომპლექტებულია, მათგან იგრძნობა ის სიგნალი, რომ დაინტერესებულები არიან იმ მიმართულებით, თუ როგორ განვითარდეს ვაჭრობა ორმხრივ დონეზე ქვეყნებს შორის“,- განუცხადა კელიმ ჟურნალისტებს.

ელჩის თქმით, აშშ-ის ვიცე-პრეზიდენტის, მაიკ პენსის ვიზიტის დროს ორ ქვეყანას შორის ორმხრივი ვაჭრობის პერსპექტივები იქნება განხილული.

„ამ ეტაპზე მიმდინარეობს ტექნიკური სამუშაოები. მოგეხსენებათ, აშშ-ის სავაჭრო წარმომადგენელს აქვს შეხვედრა საქართველოს პრემიერ-მინისტრთან, ასევე, როდესაც საქართველოში ვიზიტით აშშ-ის ვიცე-პრეზიდენტი ჩამოვა, აუცილებლად წამოიჭრება ეს საკითხი შეხვედრებზე. მე ნამდვილად მინდა შემეძლოს ვთქვა, როგორ დაჩქარდეს ეს პროცესი, მაგრამ ეს დამოკიდებულია სხვადასხვა პრიორიტეტებზე, თუმცა გეტყვით, რომ საქართველო არის პრიორიტეტი ამერიკის შეერთებული შტატებისთვის”, - განაცხადა კელიმ.