სამართალი

საქალაქო სასამართლო ფადი ასლის მოუწოდებს დარჩეს სამართლებრივ სივრცეში

თბილისის საქალაქო სასამართლო საერთაშორისო სავაჭრო პალატის თავმჯდომარის, ფადი ასლის მიერ გაკეთებულ განცხადებას ეხმიანება.

როგორც განცხადებაშია აღნიშნული, ფადი ასლის მხრიდან მოსამართლის კორუფციაში დადანაშაულება - ცილისწამებაა და არ გააჩნია გონივრული დასაბუთება.

„მედიანიუსი“ საქალაქო სასამართლოს განცხადებას უცვლელად გთავაზობთ.

„სასამართლო ხელისუფლება მკაცრად გმობს და დაუშვებლად მიიჩნევს მოსამართლის მიმართ გამოთქმულ ღირსებისა და საქმიანი რეპუტაციის შემლახველი ცნობების გავრცელებას.

საერთაშორისო სავაჭრო პალატის თავმჯდომარის ფადი ასლის მხრიდან მოსამართლის კორუფციაში დადანაშაულება, ცილისწამებაა, არ გააჩნია კონკრეტული გონივრული დასაბუთება და მიზნად ისახავს მოსამართლის დისკრედიტაციას. იმ შემთხვევაში, თუ განცხადების ავტორს გააჩნია მოსამართლის მხრიდან კორუფციული ქმედების დამადასტურებელი კონკრეტული ფაქტი, იგი არამხოლოდ უფლებამოსილია, არამედ ვალდებულიცაა მიმართოს შესაბამის უწყებებს.

კერძო სუბიექტებს შორის წარმართულ დავაში ცალსახად იკვეთება საერთაშორისო სავაჭრო პალატის თავმჯდომარის არაჯანსაღი მიკერძოებულობა პროცესში მონაწილე ერთ-ერთი მხარის მიმართ, რაც სავარაუდოდ მიანიშნებს საქმის შედეგის მიმართ ფადი ასლის კონკრეტულ ინტერესებზე.

თბილისის საქალაქო სასამართლო მოუწოდებს ფადი ასლის დარჩეს სამართლებრივ სივრცეში და ნაცვლად დეზინფორმაციული ხასიათის განცხადებებისა, დაელოდოს ამავე საქმეებზე ზემდგომი ინსტანციის გადაწყვეტილებებს. ასევე, მნიშვნელოვნად მიგვაჩნია ამ უკანასკნელმა თავი შეიკავოს მსგავსი განცხადებებისგან, რათა თავიდან იქნას აცილებული კანონსაწინააღმდეგო ქმედება“,- ნათქვამია განცხადებაში.

ფადი ასლიმ საქალაქო სასამართლოს მოსამართლეს, რომელმაც თებერვალში ფილიპ მორის საქართველოს და ბრითიშ ამერიკან ტობაკოს მრავალმილიონიანი ჯარიმები დააკისრა, კორუმპირებული უწოდა.

მონიკა დავლიანიძე