პოლიტიკა

საპროტესტო აქციებსაც ვგეგმავთ და მაქსიმალურად მივიყვანთ ჭეშმარიტებამდე ამ მარაზმს - ხორავას ქუჩაზე მოკლული მოზარდის მამა

ხორავას ქუჩაზე მოკლული ერთ-ერთი მოზარდის, დავით სარალიძის მამა, ზაზა სარალიძე „ღია პლატფორმაში“ შემავალ ოპოზიციური პოლტიკური პარტიების წევრებს შეხვდა და საქმის გამოძიების მასალები გააცნო.

სარალიძემ განმარტა, რატომ გადაწყვიტა პოლიტიკოსებთან შეხვედრა. მან აღნიშნა, რომ აქციებს გეგმავს.

„იქიდან გამომდინარე, რომ ვერანაირად შევძელი ჭეშმარიტების მიღწევა ( აქამდეც ვამბობდი, რომ ნებისმიერ ბერკეტს გამოვიყენებდი ჭეშმარიტების დასადგენად), მივმართე მთელ პოლიტიკურ წარმომადგენლებსა და საზოგადოებას, რომ გვერდში დამიდგნენ და დამეხმარონ ჭეშმარიტების დადგენაში. საპროტესტო აქციებსაც ვგეგმავთ და მაქსიმალურად მივიყვანთ ჭეშმარიტებამდე ამ მარაზმს", - განაცხადა ზაზა სარალიძემ.

სარალიძის თქმით, მას უთვალთვალებენ.

„პროკურატურა ჩემს დისკრედიტაციას ცდილობს. რამდენჯერმე შევნიშნე, როგორ დამყვებოდა ერთი და იგივე მანქანა. ხშირი შემთხვევა იყო ეს. ბოლომდე ვიბრძოლებ, რათა ჩემი შვილის მკვლელები გამოაშკარავდნენ. 2 დეკემბერს, ჩემს შვილთან ერთად, მეც მომკლეს“, -თქვა ხორავას ქუჩაზე მოკლული მოზარდის მამამ.

შეხვედრის ერთ-ერთი მონაწილის, „ერთიანი ნაციონალური მოძრაობის“ ლიდერის, ნიკა მელიას თქმით, სარალიძეს მოქალაქეთა მხარდაჭერა სჭირდება.

„ადამიანი, რომელსაც შვილი მოუკლეს და დღეს ღიად საუბრობს, რომ მას უთვალთვალებენ, იმიტომ რომ ვერ გატეხეს, პროკურატურამ ვერ დაიმორჩილა. იცის სახელობითად მკვლელები საკუთარი შვილის და ამ მკვლელებს არ სჯიან, არ სჯიან მხოლოდ იმიტომ, რომ ყოფილი მაღალჩინოსნის შვილია ერთ-ერთი, ბატონი მირზა სუბელიანის, რადგან ამ საქმეს არ დაანება თავი, დღეს, როგორც ჩანს, ხელისუფლებამ გადაწყვიტა, უთვალთვალოს და აშანტაჟოს და ადამიანს, დიახ, სჭირდება დახმარება და გვერდში დგომა და არა მხოლოდ პოლიტიკოსების, ახლა სამოქალაქო ერთობაა საჭირო“, -განაცხადა მელიამ.

ედპ-ის ლიდერის, ბაჩუქი ქარდავას თქმით, „ეს საქართველოს თითოეული მოქალაქის პრობლემაა, როდესაც, შესაძლებელია, ადამიანს შვილი მოუკლან და მთელი სისტემა მას დაეჯახოს, იმიტომ რომ ვიღაცას ხელს აფარებენ პროკურატურაში“.

ცნობისთვის, ხორავას ქუჩაზე ორი მოზარდი 2017 წლის 1-ელ დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა, მეორე მოზარდი კი, ექიმების მცდელობისა და რამდენიმე ოპერაციის ჩატარების მიუხედავად, მომდევნო დღეს საავადმყოფოში დაიღუპა.