პოლიტიკა

საპატრიარქოში რომ შედიხარ, სულ სხვა ძალით გამოდიხარ, აბსოლუტურად დამშვიდებული - ზაზა სარალიძე

ხორავას ქუჩაზე მოკლული დავით სარალიძის მამამ, ზაზა სარალიძემ და მისმა მეუღლემ საქართველოს საპატრიარქო უკვე დატოვეს.

როგორც სარალიძემ ილია მეორესთან შეხვედრის შემდეგ განაცხადა, მათ ხორავას ქუჩის საქმეზე არ უსაუბრიათ. მისი თქმით, ილია მეორემ ის სადილზე მიიწვია.

„შევხვდი პატრიარქს, მკვლელობასთან დაკავშირებით არ გვისაუბრია, უბრალოდ დღეს დამპატიჟა თავად უწმინდესმა სიონის ტაძარში, სადაც პირველად ვეზიარე და იქიდან დამპატიჟა სადილზე. მეოთხედ შევხვდი პატრიარქს ჩემი ცხოვრების მანძილზე, ძალიან დიდი ძალა გადმოვიდა ჩემზე. პატრიარქის ნათესავმა გამომაცილა და მას ვეუბნებოდი, რომ ეს არის სულიერი სიმშვიდის ტერიტორია, შიგნით რომ შედიხარ, სულ სხვა ძალით გამოდიხარ, აბსოლუტურად დამშვიდებული“, – განაცხადა სარალიძემ.

პატრიარქმა სარალიძეს საჩუქრად ხატი გადასცა.

შეხვედრამდე სარალიძე სიონის საკათედრო ტაძარში იმყოფებოდა, სადაც დღეს ღვთისმსახურება ილია მეორემ აღავლინა. ზიარების შემდეგ პატრიარქმა სარალიძე და მისი მეუღლე საპატრიარქოში საკუთარი ავტომობილით წაიყვანა.

პატრიარქმა ქადაგების დროს ხორავას ქუჩაზე მომხდარ ტრაგედიაზე ისაუბრა და აღნიშნა, რომ ზაზა სარალიძე შვილის სიკვდილის შემდეგ დღეს პირველად ეზიარა.