პოლიტიკა

საპატრიარქოს დელეგაცია მხარს უჭერს ქართველი ხალხის ნებას - ჯეიმს აპატურაი

ამ შეხვედრიდან ჩვენთვის ყველაზე მნიშვნელოვანი მომენტია ის, რომ საპატრიარქოს დელეგაცია მხარს უჭერს ქართველი ხალხის ნებას, - განცხადა კავკასიასა და ცენტრალურ აზიაში ნატო-ს გენერალური მდივნის წარმომადგენელმა, ჯეიმს აპატურაიმ ბრიუსელში, ნატო-ს შტაბბინაში, სადაც საქართველოს საპატრიარქოს დელეგაციას უმასპინძლა.

,,საპატრიარქოს დელეგაციასთან შეხვედრა უდიდესი პატივია. ამ სახის ვიზიტი პირველად განხორციელდა. ნატო-ს გენერალური მდივნის მოადგილე თბილისში პატრიარქს შეხვდა და ეს ვიზიტი ამ შეხვედრის გაგრძელებაა.

სასულიერო პირების დელეგაცია კარგად იყო მიმდინარე მოვლენებზე ინფორმირებული და სიღრმისეული საუბარი შედგა საქართველოს შიდაპოლიტიკურ პროცესებზე, საქართველოს გამოწვევებზე და იძულებით გადაადგილებულ პირებზე. ასევე ვისაუბრეთ, შავი ზღვის უსაფრთხოებაზე, ნატო-საქართველოს ურთიერთობებზე. ამ შეხვედრიდან ჩვენთვის ყველაზე მნიშვნელოვანი მომენტია ის, რომ საპატრიარქოს დელეგაცია მხარს უჭერს ქართველი ხალხის ნებას. ჩვენ ვიცით, რომ ეკლესია ქართულ საზოგადოებაში მნიშვნელოვან როლს თამაშობს. საბოლოო ჯამში ძალიან კონსტრუქციული შეხვედრა იყო’’, - განუცხადა ქართველ ჟურნალისტებს ჯეიმს აპატურაიმ.

თავის მხრივ, ბრიუსელში ვიზიტის მნიძვნელობაზე ისაუბრა შეხვედრის შემდეგ ახალციხის და ტაო-კლარჯეთის მიტროპოლიტმა, მეუფე თეოდორემ.

,,ჩვენთვის ძალიან სასიხარულოა ასეთი თბილი შეხვედრა. საკმაოდ ფართო და დიდი ინფორმაცია მოგვაწოდეს საქართველოსა და ნატო-ს ურთიერთობასთან დაკავშირებით. დღეს და ხვალ ალბათ გვექნება კიდევ ფართო ინფორმაცია ევროპული სტრუექტურებიდან ამ ურთიერთობაზე’’, - განაცხადა დელეგაციის წარმომადგენელმა.

საპატრიაქროს დელეგაცია მოინახულებს ბრიუსელში არსებულ ქართულ სამრევლოს და შეხვდებიან ქართული დიასპორის წარმომადგენლებს.

ნინო ექვთიმიშვილი