პოლიტიკა

საპარლამენტო უმრავლესობის წევრი რევაზ არველაძე უმრავლესობაში ცვლილებებს არ ელოდება

საპარლამენტო უმრავლესობის წევრი, რევაზ არველაძე უმრავლესობაში ცვლილებებს არ ელოდება. ის გედევან ფოფხაძისა და ირაკლი კობახიძის გამოსვლებს უარყოფითად აფასებს.

„აზრთა სხვადასხვაობა ჩვეულებრივი ამბავია. არ მომწონს, როცა ეს ყველაფერი პლენარულ სხდომაზე ხდება და ტელევიზიებით მიმდინარეობს. არც ერთი და არც მეორე გამოსვლა არ მომეწონა. საუბარი იმაზე, რომ იმპიჩმენტის პროცესი დაიწყოს, სწორი არ იქნება“, – აცხადებს დეპუტატი.
„რაც შეეხება გიორგი კვირიკაშვილს, ის პარტიის თავმჯდომარეა. წამყვანი ფიგურაა და როგორც ვიცი, გადაწყვეტილებებს ერთპიროვნულად არ იღებს. პარტიაში მოდის და ამა თუ იმ საკითხზე მსჯელობა გვაქვს. არც გედევან ფოფხაძის გამოსვლა მომეწონა, როცა განაცხადა, რომ კენჭისყრის შემდეგ უმრავლესობას დატოვებდა და არც ირაკლი კობახიძის გამოსვლა მომეწონა, სადაც თქვა, რომ გედევან ფოფხაძემ უმრავლესობის წევრებს შეურაცხყოფა მიაყენა“, – განაცხადა არველაძემ.

შეგახსენებთ, რომ დეპუტატმა გედევან ფოფხაძემ საპარლამენტო უმრავლესობას დატოვების შესახებ 4 აპრილს განაცხადა.დეპუტატის თქმით, მას ეს გადაწყვეტილება საზოგადოებრივი მაუწყებლის სამეურვეო საბჭოს წევრად მმართველი გუნდის მხრიდან ნინია კაკაბაძის კანდიდატურის მხარდაჭერის გამო მიიღო.

პარლამენტის თავმჯდომარის, ირაკლი კობახიძის განცხადებით, ფოფხაძემ მძიმე შეურაცხყოფა მიაყენა თანაგუნდელებს და ეს რელიგიური თემით სპეკულირების ფონზე გააკეთა.

ცირა გურგენიძე