პოლიტიკა

სამწუხაროდ, ბრიუსელი არაერთხელ ჩაერია შიდა საქმეებში და საქართველო ამის საუკეთესო მაგალითია - მაკა ბოჭორიშვილი

ჩვენ ბოლო პერიოდში ვნახეთ, რომ, სამწუხაროდ, ბრიუსელი არაერთხელ ჩაერია შიდა საქმეებში და საქართველო არის ამის საუკეთესო მაგალითი, – ამის შესახებ საგარეო საქმეთა მინისტრმა, მაკა ბოჭორიშვილმა „იმედის“ ეთერში განაცხადა.

მინისტრის თქმით, საქართველოს შიდა საქმეებში ჩარევა უხეში ფორმით ხდებოდა და ეს მნიშვნელოვნად აზიანებდა ევროკავშირთან, ბრიუსელთან საქართველოს ურთიერთობებს.

ამავე კონტექსტში ბოჭორიშვილმა აშშ-ის მიმართ ევროკავშირის დამოკიდებულებაზეც გაამახვილა ყურადღება.

„როდესაც საუბარი შეეხება ამერიკის შეერთებულ შტატებს, მაშინ უკვე ევროკავშირის ბიუროკრატიის მხრიდან სულ სხვაგვარი გზავნილი ისმის და სხვაგვარად ხდება პოზიციონირება“, – განაცხადა მინისტრმა.

მისივე თქმით, ეს ასახავს იმ „სამწუხარო რეალობას, რომელ რეალობაშიც არის დღევანდელი ბრიუსელი“.

მინისტრმა კიდევ ერთხელ გაუსვა ხაზი საქართველოს ევროპულ იდენტობასა და მის პრინციპულ არჩევანს, გახდეს ევროკავშირის წევრი.

„ჩვენ ევროპული ქვეყანა ვართ, ჩვენი პოზიცია ყოველთვის იყო ის, რომ, თუკი ჩვენ გვსურს – და ჩვენ გვსურს – ვიყოთ ევროკავშირის ნაწილი, რომელიც არის დღეს დღევანდელი ევროპის სახე, რა თქმა უნდა, ჩვენი სუბიექტური სურვილიც იქნებოდა, რომ ევროკავშირი იყოს ძლიერი და ეს ევროკავშირი იყოს ისეთი, რომლის წევრობაც ჩვენ გვინდა“.

როგორც მინისტრმა განაცხადა, ბოლო პერიოდში ევროკავშირში მიმდინარე პროცესები რთული საყურებელია, თუმცა საქართველო ურთიერთობების გამოსწორების იმედს არ კარგავს.

„იმედს ვიტოვებთ, რომ ყველაფერი შეიცვლება და რომ რეალობის უგულებელყოფას აღარ გააგრძელებს ბრიუსელი“, – აღნიშნა მაკა ბოჭორიშვილმა.