პოლიტიკა

სამთავრობო სტრუქტურული ცვლილებების შესახებ საკანონდებლო პაკეტი პარლამენტს დღეს წარედგინება

მთავრობის საპარლამენტო მდივნის, ნათია მიქელაძის განცხადებით, სტრუქტურული ცვლილებების შესახებ საკანონდებლო პაკეტი პარლამენტს დღეს წარედგინება.

როგორც მიქელაძემ ჟურნალისტებს განუცხადა, საკანონმდებლო ცვლილებათა პაკეტი პარლამენტში დღეს დარეგისტრირდება და მისი განხილვა დაჩქარებული წესით ორშაბათიდან, 2 ივლისიდან დაიწყება.

„გაცხადებული ცვლილებების გარდა, ახალ ცვლილებებს არ უნდა ველოდოთ. რაც შეეხება სახელწოდებებს, სასჯელაღსრულების სამინისტრო იუსტიციის სამინისტროში გაერთიანდება და იუსტიციის სამინისტროს სახელწოდება უცვლელი დარჩება – იუსტიციის სამინისტრო.

დევნილთა სამინისტრო ჯანდაცვის სამინისტროში ერთიანდება და მისი სახელწოდება ოკუპირებული ტერიტორიებიდან იძულებით გადაადგილებულ პირთა, შრომის, ჯანმრთელობისა და სოციალური დაცვის სამინისტრო იქნება“, – განაცხადა მიქელაძემ.

მისივე თქმით, განათლების სამინისტროს სპორტისა და კულტურის სამინისტრო უერთდება. გაერთიანებული უწყების სახელწოდება კი, განათლების, სპორტისა და კულტურის სამინისტრო იქნება.
„სახელწოდებები კანონპროექტებში ასეა წარმოდგენილი, მაგრამ განხილვები გაიმართება და არ არის გამორიცხული, სამინისტროების სახელები დამატებით ჩამოყალიბდეს“, – განაცხადა მთავრობის საპარლამენტო მდივანმა.

ცნობისათვის, სტრუქტურული ცვლილებების თანახმად, სამინისტროების რაოდენობა 14-დან 11-მდე მცირდება. მთავრობის სტრუქტურაში 10 სამინისტრო და ერთი სახელმწიფო მინისტრის აპარატი დარჩება.