სამართალი

სამშენებლო კომპანია „სვეტის” დამფუძნებელსა და დირექტორს ბრალი წარუდგინეს

სამშენებლო კომპანია „სვეტის” დამფუძნებელს, გივი ჯიბლაძესა და დირექტორს, თორნიკე ჯანელიძეს ბრალი წარედგინათ თაღლითური გზით დიდი ოდენობით თანხების მითვისებაში.

კომპანია „სვეტის" ხელმძღვანელი პირების ადვოკატმა ვალერი გელბახიანმა განაცხადა, რომ დაკავებულები ბრალს არ აღიარებენ და იყენებენ დუმილის უფლებას.

„ბრალი წარდგენილია სისხლის სამართლის კოდექსის 180-ე მუხლის მე-2 და მე-3 ნაწილის ორი პუნქტით. ედავებიან, ვითომდა თაღლითური გზით მოქალაქეებისგან აიღეს ბინის ასაშენებელი თანხები, რომელთა რაოდენობამ შეადგინა მილიონ 600 ათასი დოლარი და ამ ადამიანებს არ მიეცათ საშუალება, ფული დაებრუნებინათ ან ბინები მიეღოთ. სულ ამ ბრალდებაში დასახელებული არის 66 დაზარალებული და მითითებულია მათ მიერ გადახდილი თანხები.

რალდებულები დანაშაულს არ აღიარებენ. მათ დრო მოითხოვეს, რათა მასალებს გაეცნონ და ამის შემდეგ მისცემენ ჩვენებებს. ამჟამად ისინი დუმილის უფლებას იყენებენ. მე ორი ტომარა მაქვს საქმის მასალები. დაახლოებით 100 კილო იქნება. ჯერ ის უნდა გავხსნა და ვნახო. ხელშეკრულებას თუ ვადები აქვს, მაშინ სამართლებრივად ჯერ კიდევ ითვლება, რომ მშენებლობის დასრულების ვადები არსებობს“, - განაცხადა ადვოკატმა.

ფინანსთა სამინისტროს საგამოძიებო სამსახურმა „სვეტის“ ხელმძღვანელები დააკავა. გამოძიება მათ მეანაბრეთა თანხების თაღლითურად მითვისებას ედავება.