საზოგადოება

სამოქალაქო სექტორი კუპრაშვილს სიცრუის გავრცელებაში ადანაშაულებს - რა წერია სასამართლო გადაწყვეტილებაში

მესამე სექტორის წარმომადგენლები ანტიკორუფციული ბიუროს ხელმძღვანელს ტყუილის გავრცელებაში ადანაშაულებენ.

საუბარია, რაჟდენ კუპრაშვილის განცხადებაზე, რომლის მიხედვითაც მისი სამსახური სამოქალაქო საზოგადოებისგან ბენეფიციარების პერსონალურ მონაცემებს არ ითხოვს.

„დღის განმავლობაში, რამდენიმე ორგანიზაციის წარმომადგენლების მიერ, მიზანმიმართულად ვრცელდება არასწორი ინფორმაცია, თითქოს ბიურო სასამართლოს ბრძანების საფუძველზე, მათი ორგანიზაციებისგან არამიზნობრივად ითხოვს მოქალაქეთა პირადი და პროფესიული საიდუმლოების ამსახველ დოკუმენტაციას.

ჩვენ მიერ მოთხოვნილი სამართლებრივი და ფინანსური დოკუმენტაცია, არ ცდება საკანონმდებლო უფლებამოსილების ფარგლებს, მიმართულია მხოლოდ გრანტის მიმღები ან პოლიტიკური აქტივობის მქონე ორგანიზაციების საქმიანობის მიზნობრიობის შესწავლისკენ. ამ პროცესში, საქართველოს კანონმდებლობის შესაბამისად, სრულად იქნება უზრუნველყოფილი პროფესიული, თუ პერსონალური ინფორმაციის დაცულობა.მიგვაჩნია, რომ არსებული დეზინფორმაციული კამპანია ემსახურება მოსახლეობის შეცდომაში შეყვანას და მიზნად ისახავს გამჭვირვალობისკენ მიმართული კანონმდებლობისა და სამართლებრივი პროცესის დისკრედიტაციას“, – განაცხადა რაჟდენ კუპრაშვილმა.

კუპრაშვილის საპასუხოდ, მესამე სექტორმა სასამართლოს განჩინების ნაწილი გაასაჯაროვა. დოკუმენტის თანახმად, ანტიკორუფციული ბიუროს აინტერესებს გაიგოს, ვის და რატომ დაეხმარნენ მესამე სექტორის წარმომადგენლები.

სასამართლოს განჩინება არასამთავრობო ორგანიზაციებს ავალდებულებს, ბენეფიციარების და აქტივობებში ჩართული პირების სახელსა და გვარს, პირად ნომრებსა და აქტივობების ამსახველ ვიდეო - ფოტო მასალების გადაცემას.

17 ივნისს ანტიკორუფციული ბიუროს მოთხოვნის საფუძველზე, 5 უფლებადამცველ ორგანიზაციას სასამართლოს ბრძანებები გადაეცათ.

„რუსული კანონების აღსრულება დაიწყო“ - ასე უპასუხეს გავლენიანი ორგანიზაციების ხელმძღვანელებმა რაჟდენ კუპრაშვილს.

მათი თქმით, არ აპირებენ სამართლებრივი დაცვის ქვეშ მყოფი მოქალაქეების ნდობის ღალატს, „თუნდაც ამ გადაწყვეტილებას მათი დაპატიმრება მოჰყვეს“.

წყარო, ფოტო ტვ პირველი