მსოფლიო

სამხრეთ და ჩრდილოეთ კორეების ლიდერებს შორის მოულოდნელი შეხვედრა შედგა

სამხრეთ და ჩრდილოეთ კორეების ლიდერები ერთმანეთს დემილიტარიზებულ ზონაში შეხვდნენ. ინფორმაციას ბიბისი ავრცელებს.

ეს რიგით მეორე შეხვედრაა კიმ ჩენ ინსა და მუნ ჯე ინს შორის. სავარაუდოდ, ორივე მხარე ცდილობს, რომ აშშ-ისა და ჩრდილოეთ კორეის ლიდერების შეხვედრა შედგეს.

„ორივე ლიდერმა აზრები გაცვალეს…, რათა ჩრდილოეთ კორეა-აშშ-ის სამიტი წარმატებულად გაიმართოს“, -განაცხადეს მუნ ჯე ინის ოფისში.

სამხრეთ კორეის პრეზიდენტი მოლაპარაკებების შედეგებზე ხვალ დილას ისაუბრებს.

ხუთშაბათს დონალდ ტრამპმა კიმ ჩენ ინთან სინგაპურში, 12 ივნისისთვის დაგეგმილი შეხვედრა გააუქმა. გაგზავნილ წერილში აშშ-ის პრეზიდენტმა ფხენიანი „ღია მტრობაში“ დაადანაშაულა. ამის მიუხედავად დღეს ტრამპმა ტვიტერზე დაწერა, რომ სამიტის შესაძლო ჩატარებაზე ვაშინგტონსა და ფხენიანს შორის მოლაპარაკებები კვლავ მიმდინარეობს.

პირველად მუნ ჯე ინი და კიმ ჩენ ინი ერთმანეთს 27 აპრილს შეხვდნენ. ისტორიულ სამიტზე მხარეები სრულ ბირთვულ განიარაღებასა და ფორმალური ომის დასრულებაზე შეთანხმდნენ. მეორე შეხვედრა უნდა გამართულიყო 16 მაისს, თუმცა ფხენიანმა აშშ-ისა და სამხრეთ კორეის ერთობლივი სამხედრო სწავლების, „Max Thunder-ის გამო შეხვედრა გააუქმა.