სამართალი

სამი მოზარდის დაჭრაში ბრალდებულს ექსპერტიზა ჩაუტარდება

ადვოკატ ირმა ჭკადუას ინფორმაციით, სამი მოზარდის დაჭრის ბრალდებით დაკავებულ ახალგაზრდას ვაკე-საბურთალოს პოლიციის სამმართველოს ნომერ მე-7 დაწესებულებაში სხეულზე ექსპერტიზა ჩაუტარდება.

როგორც ადვოკატმა ,,პირველ არხთან“ საუბარში აღნიშნა, განყოფილებაში ექსპერტების მისვლის შემდეგ, დაკავებულს ბრალს ოფიციალურად წარუდგენენ.

ჭკადუას თქმით, ბრალდებული კანონით მინიჭებულ უფლებას იყენებს, რომლის ფარგლებშიც ექსპერტიზის ჩატარების უფლება აქვს.

ირმა ჭკადუას მტკიცებით, ყოფილი თანაკლასელების დაჭრაში ბრალდებული გუშინ პოლიციას თავად ჩაბარდა.

შსს-ს ინფორმაციით, 2000 წელს დაბადებულ ა.ნ-ს ჯანმრთელობის განზრახ მძიმე დაზიანების ბრალდებით ცხელ კვალზე დააკავეს.

მის მიერ ჩადენილი დანაშაული 9-დან 13 წლამდე ვადით თავისუფლების აღკვეთას ითვალისწინებს.

„გამოძიებამ დაადგინა, რომ მიმდინარე წლის 31 იანვარს თბილისში, ალ.ყაზბეგის გამზირზე, ე.წ. წითელი ბაღის ტერიტორიაზე, ა.ნ.-მ ურთიერთშელაპარაკებისას ყოფილ თანაკლასელებს – 2000 წელს დაბადებულ ნ.ც.-ს და 2000 წელს დაბადებულ ი.ც.-ს ცივი იარაღით მუცლისა და გულმკერდის არეში თითო ჭრილობა, ხოლო 2000 წელს დაბადებულ ლ.ხ.-ს ხელზე მსუბუქი ჭრილობა მიაყენა და შემთხვევის ადგილიდან მიიმალა. სამივე დაჭრილი არასრულწლოვანი საავადმყოფოში გადაიყვანეს. მათ სიცოცხლეს საფრთხე არ ემუქრება“, – ნათქვამია შსს-ს მიერ გავრცელებულ განცხადებაში.