პოლიტიკა

სამგორის რაიონის გამგებელი ენმ-ს ბრალდებას პასუხობს

თბილისის საკრებულოს გუშინდელ სხდომაზე ,,ერთიანი ნაციონალური მოძრაობის“ წარმომადგენლებმა სამგორის რაიონის გამგებლის თანამდებობიდან გადაყენება მოითხოვეს.

ოპოზიციური პარტიის ინფორმაციით, გამგებელი სისხლის სამართლის კოდექსის რამდენიმე მძიმე მუხლით არის ბრალდებული.

აღნიშნულ ფაქტს უარყოფს თავად სამგორის რაიონის გამგებელი დავით კერესელიძე და აცხადებს, რომ მის მიმართ სისხლის სამართლის საქმე სამი წლის წინ მომხდარი ინციდენტის გამო მუქარის მუხლით აღიძრა, კონფლიქტის დროს არ მომხდარა არც ქონებრივი და არც ფიზიკური დაზიანება.

„სამი წლის წინ, მარტში, პარკირების დროს მოხდა ჩვეულებრივი საყოფაცხოვრებო კონფლიქტი, ერთ-ერთი მცხოვრებლის სიძის მანქანა იყო გაჩერებული. ამ კონფლიქტში არ მომხდარა არც ქონებრივი, არც ფიზიკური დაზიანება და ეს პიროვნება ადგა და საჩივარი შეიტანა. ეს არის მუქარის მუხლი, ჩვეულებრივი მუქარაა. შენიშვნა მივეცი მანქანაზე, ნუ გააჩერებ მეთქი, ეს ფაქტი ერთხელ, ორჯერ განმეორდა, მესამეჯერ შენიშვნა მივეცი და ამაზე ადამიანი შეშინდა და იჩივლა,“ - განაცხადა დავით კერესელიძემ „კურიერთან“ სატელეფონო საუბრისას.

თავის მხრივ, ენმ-ს წევრის ლევან ხაბეიშვილის თქმით, აუცილებელია, რომ გამოძიებისა და სასამართლო პროცესების მიმდინარეობის დროს სავარაუდო დამნაშავემ დატოვოს თანამდებობა.

„სასამართლოდან ინფორმაციის გამოთხოვა ერთი წელია შეუძლებელი გახდა და ძნელია დაადგინო, თუ რომელი მუხლით არის სისხლის სამართლის საქმე აღძრული. ფაქტია ის, რომ აღძრულია და მიმდინარეობს სისხლის სამართლებრივი დევნა ამ გამგებლის მიმართ. გაასაჯაროონ რა საქმეზე მიმდინარეობს, ამასთანავე აუცილებელია და მნიშვნელოვანია, რომ გამოძიებისა და სასამართლო პროცესების მიმდინარეობის დროს სავარაუდო დამნაშავემ დატოვოს თანამდებობა,“- განაცხადა ხაბეიშვილმა.