პოლიტიკა

სალომე ზურაბიშვილს 1 897 309 ლარის ვალი აქვს, მათ შორის მომღერლებისთვის გადასახდელი ჰონორარიც

მმართველი გუნდის მიერ მხარდაჭერილ საპრეზიდენტო კანდიდატს, სალომე ზურაბიშვილს 1 897 309 ლარის ვალი დაუგროვდა.

სახელმწიფო აუდიტის სამსახურის ინფორმაციით, დეკლარაციის თანახმად, რომელიც 17-28 ოქტომბრის პერიოდს ასახავს, აღნიშნულია, რომ „ბანკი ქართუს“ გარდა, ზურაბიშვილს იმ მომღერლების ვალი აქვს, რომლებმაც სპორტის სასახლეში საპრეზიდენტო კანდიდატის ამომრჩეველთან შემაჯამებელ შეხვედრაზე იმღერეს.

ამავე დოკუმენტის თანახმად, მომღერლების ჰონორარი 142,90 ლარიდან 600 ლარამდე მერყეობს.

რაც შეეხება ღონისძიების რეჟისორს, ბაკურ ბაკურაძეს, რომელმაც მუსიკალური პროგრამის რეჟისურა გააკეთა, ზურაბიშვილისგან 1000 ლარი ეკუთვნის.

გარდა ამისა, ზურაბიშვილს „ალფა სტუდიოსთვის“ 113 175 ლარი აქვს გადასახდელი.

დეკლარაციის თანახმად, ზურაბიშვილმა საიმიჯო კლიპის დამზადება ორ კომპანიას დაუკვეთა, რომელთაც ჯამში 73 335 ლარი უნდა გადაუხადოს. შპს „ლიმონს“ - 33335 ლარი, ხოლო შპს „აისბრეიქერს“ – 40 000 ლარი.

გარდა ამისა, დეკლარაციიდან ირკვევა, რომ ღონისძიებაზე ფოიერვერკის გაშვებისთვის ზურაბიშვილმა შპს „შოუმენს“ 2700 ლარი უნდა გადაუხადოს.