პოლიტიკა

სალომე ზურაბიშვილიც დაიწყებს, რასაკვირველია, შეხვედრებს... მე ვერც გრიგოლ ვაშაძის სიარულს ვერ ვხედავ - გია ვოლსკი

„მე ვერც გრიგოლ ვაშაძის სიარულს ვერ ვხედავ“, - ასე უპასუხა პარლამენტის ვიცე-სპიკერმა გია ვოლსკიმ ჟურნალისტების კითხვას, თუ რატომ აღარ ჩნდება „ქართული ოცნების“ მიერ მხარდაჭერილი საპრეზიდენტო კანდიდატი სალომე ზურაბიშვილი მედიასთან და რატომ არ ხვდება ის ამომრჩეველს.

ვოლსკიმ დასმულ კითხვაზე საპასუხოდ განაცხადა, რომ ზურაბიშვილი დაიწყებს ამომრჩეველთან შეხვედრებს.

„მე ვერც მისი კონკურენტის სიარულს ვერ ვხედავ. მისი კონკურენტის არაორაზროვანი განცხადება იყო გავრცელებული იმის თაობაზე, რომ არავითარი კონსტიტუცია მას არ აინტერესებს და არცერთი კითხვა არ დასმულა იმასთან დაკავშირებით, რომ გრიგოლ ვაშაძე დაპირისპირების ორგანიზებას აპირებს, რამაც მისი აზრით, უნდა შეცვალოს ხელისუფლება. ეს არის კონსტიტუციური უფლებამოსილებების აბსოლუტური გაუთვალისწინებლობით გაცხადებული. ვფიქრობ, რომ ეს საყურადღებოა. არ მახსოვს გრიგოლ ვაშაძეს ბოლო პერიოდში სხვა მნიშვნელოვანი შეხვედრა ჰქონოდეს თუ არა ასეთი როყიო განცხადებები.

სალომე ზურაბიშვილიც დაიწყებს, რასაკვირველია, შეხვედრებს, ჩამოყალიბდება. ჩვენთან ერთად კონსულტაციებს გადის საარჩევნო სისტემაში ჩართულ აქტივისტებთან და საკვანძო ფიგურებთან ერთად“, -განაცხადა ვოლსკიმ.