პოლიტიკა

სალომე ზურაბიშვილის გარკვეული განცხადებები 2008 წლის ომზე ინტერპრეტაციის საშუალებას იძლეოდა - ირაკლი კობახიძე

საქართველოს პარლამენტის თავმჯდომარემ , ირაკლი კობახიძემ მმართველი გუნდის მიერ მხარდაჭერილი საპრეზიდენტო კანდიდატის სალომე ზურაბიშვილის მიერ 2008 წლის ომზე გაკეთებულ განცხადებებზე საუბრისას თქვა, რომ ამ თემაზე „ქართულ ოცნებას“ ჰქონდა კონსულტაციები ზურაბიშვილთან.

კობახიძის შეფასებით, ზურაბიშვილის განცხადებები ინტერპრეტაციის საშუალებას იძლეოდა.

„იყო გარკვეული განცხადება, რომელიც იძლეოდა ინტერპრეტაციის საშუალებას, ამიტომ ჩვენ გვქონდა კონსულტაციები ქალბატონ სალომესთან, მივიღეთ მისგან განმარტება იმასთან დაკავშირებით, თუ რა იგულისხმებოდა კონკრეტულ განცხადებებში და მოვისმინეთ ის, რაც მოვისმინეთ დღესაც.

კიდევ ერთხელ, მთავარია ის, რომ გვქონდეს ერთიანი პოზიცია და პოზიცია არის მარტივი, კიდევ ერთხელ, აგრესორი 2008 წელს, ომის დამწყები და ყველაფერი იყო რუსეთის ფედერაცია, თუმცა, ის თავის აგრესიულ სცენარს ვერ განახორციელებდა, რომ არა მიხეილ სააკაშვილის დანაშაულებრივი, მოღალატეობრივი თუ არ ვიცი, რა დავარქვა, ქმედებები“, - განაცხადა კობახიძემ.

ცნობისთვის, საარჩევნო პროგრამის პრეზენტაციაზე ზურაბიშვილმა განაცხადა, რომ ომი რუსეთმა დაიწყო, ხოლო საქართველო პროვოკაციას წამოეგო. აქამდე ის საქართველოს ადანაშაულებდა 2008 წლის აგვისტოს ომის დაწყებაში. მისივე მტკიცებით, ქართულმა მხარემ დაბომბა ცხინვალში თავისი მოსახლეობა.