პოლიტიკა

სალომე ზურაბიშვილი სოფელ ატოცში ჩავიდა, სადაც საოკუპაციო ძალები ბოძებს ამონტაჟებენ

„ქართული ოცნების“ მიერ მხარდაჭერილი საპრეზიდენტო კანდიდატი სალომე ზურაბიშვილი საოკუპაციო ხაზთან მდებარე სოფელ ატოცში ჩავიდა.

სალომე ზურაბიშვილი ადგილზე არსებულ ვითარებას გაეცნო და ადგილობრივ მოსახლეობას გაესაუბრა.

„ეს არის ის, რაც ამ ქვეყნის ყველაზე დიდი ტკვილია დღეს, რაზედაც უნდა იზრუნოს მომავალმა პრეზიდენტმა, რათა ეს საოკუპაციო ხაზი მოიშალოს. უპირველეს ყოვლისა, უნდა ვიზრუნოთ იმ მოსახლეობის მდგომარეობაზე, რომელსაც არ შეუძლია მშვიდად იცხოვროს, არ აქვს პირობები, რათა მშვიდად იმუშაოს. პრეზიდენტი, როგორც მთავარსარდალი, უნდა ზრუნავდეს საზღვარსა და ამ ადამიანების ყოველდღიურ ბედზე“, – განაცხადა ზურაბიშვილმა.

ქარელის მუნიციპალიტეტის სოფელ ატოცის ნაწილში მავთულხლართები 2008 წლის შემდეგ არის გავლებული, რუსმა სამხედროებმა ბოძების მონტაჟი დანარჩენ პერიმეტრზე რამდენიმე დღის წინ დაიწყეს. ადგილობრივების ვარაუდით, ბოძების მონტაჟს ღობის გაბმა მოჰყვება. ორი დღის განმავლობაში რუსმა სამხედროებმა რკინის ბოძები 500 მეტრზე მეტ მანძილზე დაამონტაჟეს.