პოლიტიკა

საკრებულოს ოპოზიციურმა ფრაქციებმა საქალაქო სასამართლოს სარჩელით მიმართეს

თბილისის საკრებულოს ოპოზიციური ფრაქციები საქალაქო სასამართლოს სარჩელით მიმართავენ.

ფრაქციები მოითხოვენ სასამართლომ თბილისის მუნიციპალიტეტის საკრებულოს 29 სექტემბრისა და 10 ოქტომბრის გადაწყვეტილებები ბათილად ცნოს, როდესაც ზონალური სტატუსი შეეცვალა პუშკინის სკვერის მიმდებარე ტერიტორიას და ასევე თაბორის მთის ნაწილს.

სარჩელს ხელს აწერენ: „რესპუბლიკური პარტია“, „ევროპული საქართველო“, „ნაციონალური მოძრაობა“ და „ეროვნული ფორუმი“.

ოპოზიციონერი დეპუტატები აცხადებენ, რომ ზონალური სტატუსის შეცვლისა და ქონების გადაცემის საკითხი ბიძინა ივანიშვილის კუთვნილი კომპანიისთვის არალეგიტიმურად მოხდა.

,,ამავე დროს, ჩვენ მოვითხოვთ საკრებულოს ამ გადაწყვეტილებების აღსრულების შეჩერებას, ვიდრე სასამართლო არ მიიღებს საბოლოო გადაწყვეტილებას“, - განაცხადა „ერთიანი ნაციონალურ მოძრაობის“ საკრებულოს წევრმა მარიკა დათუკიშვილმა.