პოლიტიკა

საკრებულოს ოპოზიცია ხელისუფლებისგან „ბავშვთა სამყაროს“ მოვაჭრეების დახმარებას ითხოვს

თბილისის საკრებულოს ოპოზიციამ ბრიფინგი გამართა. დეპუტატებმა მერიისგან და მთავრობისგან მოითხოვეს „ბავშვთა სამყაროში“ გაჩენილი ხანძრის შედეგად დაზარალებული მოვაჭრეების დახმარება.

„ერთიანი ნაციონალური მოძრაობის“ საკრებულოს წევრის ირაკლი ნადირაძის განცხადებით, უნდა შეიქმნას სპეციალური კომისია, რომელიც როგორც ზარალს დაითვლის, ასევე ხანძრის მიზეზებს გამოიძიებს.

„მოვითხოვთ, შეიქმნას ერთობლივი კომისია, სადაც ჩართულები იქნებიან, უპირველეს ყოვლისა, ეს დაზარალებული ადამიანები, სადაც ჩართული იქნება როგორც ადგილობრივი, ასევე ცენტრალური ხელისუფლება, რომელიც სრულიად დაითვლის იმ ზარალს, რომელიც მიადგა ამ ადამაინებს“, - თქვა ნადირაძემ.

ენმ-ის წევრის თქმით, აღნიშნული კომისიის მუშაობის პერიოდში ბანკებისთვის კრედიტების გადახდა დროებით უნდა შეჩერდეს.

„ხელისუფლებამ ასევე უნდა მიმართოს ეროვნულ ბანკს, რომ შეაჩეროს ეს კრედიტები, რომლებიც ამ ადამიანებს გააჩნიათ, მანამ, სანამ ეს კომისიები იმუშავებენ, სანამ რამე დასკვნა დაიდება. ერთჯერადად თბილისის მერიის სარეზერვო ფონდიდან გამოყოფილი იყოს თანხა, რომელიც მისცემს საშუალებას ამ ადამიანებს, გამოკვებონ თავისი ოჯახები“, - თქვა ნადირაძემ.

მისივე ინიციატივით, ბავშვთა სამყაროს მოვაჭრეები სტიქიით დაზარალებულთა სტატუსს უნდა გაუთანაბრდნენ.

პარალელურად მოვაჭრეებმა აქცია გამართეს საკრებულოსთან. ისინი მერიასა და ხელისუფლებას უმოქმედობაში ადანაშაულებენ და ითხოვენ ზარალის სრულიად ანაზღაურებას.

შეგახსენებთ, რომ „ბავშვთა სამყაროში“ ხანძარი 30 იანვარს გაჩნდა. ამ ფაქტზე გამოძიება ამ დრომდე მიმდინარეობს.

ანა მებურიშვილი