პოლიტიკა

საკრებულოს დღევანდელი სხდომა უკანონოდ იხურება, რადგან კანონით გათვალისწინებულ მიზნებს არ ემსახურება - „ინიციატივა საჯარო სივრცისთვის“

არასამთავრობო ორგანიზაცია „ინიციატივა საჯარო სივრცისთვის“ თბილისის საკრებულოში 16 საათზე დანიშნულ სხდომასთან დაკავშირებით განცხადებას ავრცელებს.

ორგანიზაციის შეფასებით, სხდომა უკანონოდ იხურება, რადგან განსახილველი საკითხი არ უკავშირდება პერსონალურ მონაცემებს, კომერციულ ან სახელმწიფო საიდუმლოებას.

„ინიციატივა საჯარო სივრცისთვის“ თქმით, ეს გარემოება საკრებულოს დღევანდელი გადაწყვეტილება ბათილობის საფიუძველს იძლევა.

„კანონმდებლობის მიხედვით, თითოეული კოლეგიური საჯარო დაწესებულება ვალდებულია, ღიად და საჯაროდ წარმართოს თავისი სხდომები, გარდა იმ შემთხვევებისა, თუ სხდომის დახურვა ემსახურება პერსონალურ მონაცემების, სახელმწიფო ან კომერციულ საიდუმლოებას მიკუთვნებული ინფორმაციის დასაიდუმლოებას.

კოლეგიური საჯარო დაწესებულების სხდომის კანონით დადგენილი წესის დარღვევით ჩატარება იწვევს ამ სხდომაზე მიღებული გადაწყვეტილების ბათილად გამოცხადებას სასამართლოს მიერ.

საკრებულოს თავჯდომარის განცხადება, პირდაპირ მიანიშნებს, რომ სხდომის დახურვის მოტივი, კანონით გათვალისწინებულ მიზნებს არ ემსახურება, შესაბამისად, სხდომა იხურება უკანონოდ, რაც ნებისმიერი მასზე მიღებული გადაწყვეტილების ბათილობის საფუძველია“, წერია ორგანიზაციის განცხადებაში.

შეგახსენებთ, საკრებულოს თავმჯდომარის გიორგი ალიბეგაშვილის განცხადებით, საკრებულოს დღევანდელ სხდომაზე მხოლოდ საკრებულოს წევრებს, თანამშრომლებსა და მედიას დაუშვებენ. დღეს უნდა იმსჯელონ ბიძინა ივანიშვილთან დაკავშირებული ორი კომპანიისთვის თაბორის მთასა და პუშკინის სკვერთან მდებარე ტერიტორიების გადაცემაზე.

ანა მებურიშვილი