პოლიტიკა

საკრებულოების დეპუტატთა რაოდენობა იზრდება

პარლამენტის რეგიონული პოლიტიკისა და თვითმმართველობის კომიტეტის თავმჯდომარის, გრიგოლ ლილუაშვილის განცხადებით, ახალი ინიციატივის თანახმად, ქალაქებს, რომლებსაც 35 000 ან მეტი ამომრჩეველი ჰყავს, საკრებულოში 5 მაჟორიტარი დეპუტატი დაემატებათ.

„ეს იმ ქალაქებს შეეხებათ, რომელთაც თვითმმართველობის სტატუსი უუქმდებათ, მაგრამ აბსოლუტურად ყველა ქალაქზე გავრცელდება. გრადაცია მოსახლეობის რაოდენობის მიხედვითაა. დავუშვათ, 4 ათასიდან 10 ათასამდე ერთი მაჟორიტარის დამატება მოუწევთ, 10 ათასიდან 20 ათასამდე- ორი მაჟორიტარის და ა.შ. ხუთ მაჟორიტარამდე გრძელდება. ანუ, დამატებითი ხუთი მაჟორიტარი ეყოლება ქალაქს, რომელსაც 35 ათასი, ან უფრო მეტი ამომრჩეველი ჰყავს. ეს თვითმმართველობის მიმართულებით კიდევ ერთი წინ გადადგმული ნაბიჯი იქნება. ეს ვერსია არასამთავრობოების მხრიდან მოწონებული იყო და მხარდაჭერა გვაქვს“, - განუცხადა ლილუაშვილმა ჟურნალისტებს.

დეპუტატის თქმით, ამ ინიციატივით საქართველოს დაახლოებით 78 მაჟორიტარი დაემატება, რომლებსაც საკუთარი უფლებამოსილების განხორციელებისთვის 400 ლარს მისცემენ.

აღნიშნული წინადადება პარლამენტს უკვე გადაეგზავნა.

ანა მებურიშვილი