პოლიტიკა

საკონსტიტუციო უმრავლესობის თემა ნაციონალური მოძრაობის საარჩევნო კამპანიად იქცა ,,ქართული ოცნების“ წინააღმდეგ - ლევან კობერიძე

,,ქართული ოცნების" გლდანის მაჟორიტარი დეპუტატობის კანდიდატის ლევან კობერიძის განცხადებით, კამპანია, რომელიც ნაციონალურმა მოძრაობამ საკონსტიტუციო უმრავლესობის საკითხთან დაკავშირებით წამოიწყო, არ ემთხვევა საზოგადოების განწყობას. ამის შესახებ კობერიძემ დღეს გამართულ პრესკონფერენციაზე განაცხადა. მისი თქმით, ამას მოწმობს ის ფაქტი, რომ ყოველმა მეორე ამომრჩეველმა ხმა ,,ქართულ ოცნებას“ მისცა.

,,ეს კამპანია არ ემთხვევა საზოგადოების განწყობას, რადგან ყოველმა მეორე ამომრჩეველმა ხმა სწორედ ჩვენ მოგვცა. ეს მორიგი ფანდია, რადგან „ოცნებას“ ჯერ უბრალო უმრავლესობამდეც 10 მანდატი აკლია და წინ არჩევნების მეორე ტურია, რომელშიც აუცილებლად გავიმარჯვებთ“ - განაცხადა ლევან კობერიძემ და საპარლამენტო მმართველობასა და პრეზიდენტის არჩევის წესის ცვლილებაზეც ისაუბრა, რისი განხილვაც ახალი მოწვევის პარლამენტში იგეგმება.

,,საერთოდ, როცა საკონსტიტუციო უმრავლესობაზე ვსაუბრობთ, მთავარი გვავიწყდება - პარლამენტისა და პარლამენტარიზმის მნიშვნელობა. უნდა ჩამოვყალიბდეთ, ვართ თუ არა საპარლამენტო რესპუბლიკა. სწორედ ეს მგონია საქართველოს მოსახლეობის რეალური სურვილი და ეს საქმე ბოლომდე სწორედ ჩვენმა გუნდმა უნდა მიიყვანოს. შემდეგ კი ავტომატურად დალაგდება სახელისუფლო შტოების როლები და ფუნქციები. დღეს გვყავს ძალიან მაღალი ლეგიტიმაციის, მაგრამ ფაქტობრივად, უუფლებო პრეზიდენტი. თუ ვთანხმდებით პრინციპზე და გვაქვს საპარლამენტო რესპუბლიკა, ამის მერე ვიფიქროთ პრეზიდენტის არჩევის წესზე, როლების განაწილებაზე და ა.შ. ხოლო მანამდე, კარგად უნდა გავიაზროთ, რომ პარლამენტის ფუნქცია მხოლოდ კანონების წერა არ არის. ეს არის ადგილი, სადაც ხდება ქვეყნის განვითარების კონცეფციის შექმნა, მთავრობა უნდა ემსახურებოდეს მის აღსრულებას და ავტომატურად, შეიცვლება პრეზიდენტის როლი კლასიკურ საპარლამენტო რესპუბლიკაში.

მარი ნამგალაძე