პოლიტიკა

საკონსტიტუციო უმრავლესობა მომავალ პარლამენტს აძლევს შესაძლებლობას, მეტი გადაწყვეტილებები მიიღოს ნაკლები პრობლემებით - დავით უსუფაშვილი

ერთი პოლიტიკური პარტიის საკონსტიტუციო უმრავლესობა მომავალ პარლამენტს აძლევს შესაძლებლობას, მეტი გადაწყვეტილებები მიიღოს ნაკლები პრობლემებით, მაგრამ ამასობაში, ალბათ, ავალდებულებს მომავალი პარლამენტის თითოეულ წევრს, რომ მეტი დაფიქრებით და განსჯით მიიღოს გადაწყვეტილებები, რათა შეცდომები ნაკლები დავუშვათ, - განაცხადა პარლამენტის თავმჯდომარემ, დავით უსუფაშვილმა საკანონმდებლო ორგანოში, სადაც მისი სახელით მიღება მიმდინარეობს.

ღონისძიებას ძველი და ახალი პარლამენტის წევრები, ასევე მინისტრთა კაბინეტის წარმომადგენლები ესწრებიან.

,,დღევანდელი შეკრებით გვინდა ხაზი გავუსვათ იმას, რომ თითეული ჩვენგანი, მიუხედავად იმისა, რომელ პოლიტიკურ პარტიას ვეკუთვნით, ვართ გამარჯვებული თუ დამარცხებული ამ კონკრეტულ არჩევნებში, ვემსახურებით საქართველოს, ჩვენს საერთო სამშობლოს.

სახელმწიფო სამსახური არ არის პრივილეგია და ჯილდო, ეს არის საპატიო შრომა. შევიკრიბეთ იმიტომ, რომ საქართველოს მოსახლეობას კიდევ ერთხელ მივცეთ იმედი, რომ ქვეყანას ჰყავს ხელისუფლება, ჰყავდა ხელისუფლება, ეყოლება ახალი ხელისუფლება, რომელიც გაუძღვება ქვეყანას, უზრუნველყოფს შემდეგი არჩევნების ჩატარდებას და ასე გაგრძელდება. ჩვენ აღარ გვექნება სახელისუფლებო წყვეტები და ისეთი მოვლენები, რომლებიც სამწუხაროდ, ამ პარლამენტშიც ვითარდებოდა, მიუხედავად იმისა ვართ კმაყოფილები, თუ ნაკლებად კმაყოფილები“, - განაცხადა დავით უსუფაშვილმა.

მისივე თქმით, მე-8 მოწვევის პარლამენტი ისეთივე მრავალპარტიული და ჭრელი იყო, როგორიც ქართული საზოგადოებაა.

„ამ სიჭრელემ შეიძლება, ბევრი გადაწყვეტილების მიღების შესაძლებლობა დააკარგვინა პარლამენტს, სამაგიეროდ, ამ სიჭრელის გამო, შესაძლოა, შეცდომებიც ცოტა დავუშვით. მომავალი პარლამენტი, თავის მხრივ, იქნება ასევე გამორჩეული, ვინაიდან ერთი პოლიტიკური პარტიის საკონსტიტუციო უმრავლესობა იქნება, რაც, ერთი მხრივ, მომავალ პარლამენტს აძლევს შესაძლებლობას, მეტი გადაწყვეტილებები მიიღოს ნაკლები პრობლემებით, მაგრამ ამასობაში, ალბათ, ავალდებულებს მომავალი პარლამენტის თითოეულ წევრს, რომ მეტი დაფიქრებით და განსჯით მიიღოს გადაწყვეტილებები, რათა შეცდომები ნაკლები დავუშვათ. შეცდომებისგან კი, დაზღვეული არავინ ვართ“, - განაცხადა უსუფაშვილმა.

ნინო ექვთიმიშვილი