პოლიტიკა

საკონსტიტუციო ცვლილებების თანახმად, უცხოეთის მოქალაქეებს ყველა დანისნულების მიწის საკუთრება ეზღუდებათ - ლევან ალაფიშვილი

იურისტმა ლევან ალაფიშვილმა ფეისბუკის საკუთარ გევრდზე მიწის შესახებ საკონსტიტუციო ჩანაწერი განმარტა.

მისი თქმით, საკონსტიტუციო ცვლილებების თანახმად, უცხოელებს ეზღუდება არა მარტო სასოფლო-სამეურნეო, არამედ ყველა სახის მიწის შეძენა. ალაფიშვილის განმარტებით, კანონში „მიწის“ ზუსტი დანიშნულება ( ამ შემთხვევაში სასოფლო-სამეურნეო) დაკონკრეტებული არაა, ხოლო მსგავსი ფორმულირება გამორიცხავს საკონსტიტუციო სასამართლოში ამ ცვლილებების გასაჩივრებას.

„მიწის საკუთრების შეზღუდვა, კონსტიტუციის პროექტში და პოლიტრიტორიკაში.

კონსტიტუციის ყველა პროექტში წერია „მიწა“, დანიშნულებისა დაკონკრეტების გარეშე.

უმრავლესობის წარმომადგენლებს არასდროს უთქვამთ, რა ეწერა კონსტიტუციის პროექტში, საუბრობდნენ მხოლოდ სასოფლო მიწაზე, პროექტი კი არასასოფლოსაც ეხება.

ეს ფორმულირება საკონსტიტუციო სასამართლოში წასვლისა და უფლების დაცვის საშუალებასაც სპობს, საბოლოო წერტილს უსვამს ამ პერსპექტივასაც.

მე-19 მუხლის მე-4 პუნქტის შინაარსი და ფორმულირება იცვლებოდა, მაგრამ „მიწა“ არასდროს შეცვლილა, ასე ეყარა კენჭი 2 მოსმენით. ამდენად, ტექნიკური ხარვეზის მიზეზით მე-3 მოსმენაზე ვეღარ შეიცვლება.

ეს ფორმულირება ნიშნავს, რომ უცხოელებს (ან ქართველებსაც, უცხოელთა პარტნიორებს) ყველა სახის მიწის საკუთრება ეზღუდებათ. გამონაკლისები შეიძლება დადგინდეს (და არა, აუცილებლად დადგინდება!) ორგანული კანონით. მაგ.: ფოთში დასაშვებია, გორში - არა, სასოფლო დასაშვებია, არასასოფლო - არა, სათიბი დასაშვებია, სახნავი - არა და სხვა, და პირიქით. მმართველი პოლიტიკური ძალის პოლიტგემოვნების მიხედვით, 2020-ში, 2024-ში ან მერე ვინ იქნება პარლამენტში და რას იზამს ამას ვერც ინვესტორი, ვერც დღევანდელი მმართველნი და ვერც ჩვენ რიგითი მოკვდავნი ვერ განვჭვრეტთ, ჰოდა როგორი გრძელვადიანი და სტაბილური საინვესტიციო გარემო და განვითარებული ეკონომიკა გვექნება რთულად დასანახი არ უნდა იყოს!“, - დაწერა ალაფიშვილმა სოციალურ ქსელში.

ანა მებურიშვილი