პოლიტიკა

საკონსტიტუციო ცვლილებათა პაკეტი დაბალი ლეგიტიმაციისა - ფიქრია ჩიხრაძე

15 კვალიფიციური პარტიის საინიციატივო საბჭოს ინიციატივით კონფერენცია მიმდინარეობს საკონსტიტუციო ცვლილებებთან დაკავშირებით. შეხვედრაზე არის წარმოდგენილი თითქმის სრული პოლიტიკური სპექტრი მმართველი გუნდის გამოკლებით. გარდა ამისა, მას ესწრებიან საერთაშორისო ორგანიზაციების, სახალხო დამცველის აპარატის წარმომადგენლები და ექსპერტები.

პრეზიდენტის მრჩევლის ფიქრია ჩიხრაძის განცხადებით, პარლამენტში ორი მოსმენით მიღებული საკონსტიტუციო ცვლილებათა პაკეტი დაბალი ლეგიტიმაციისა, რის გამოც ხელახლა უნდა დაიწყოს მუშაობა ახალ კონსტიტუციაზე.

„დღევანდელი შეხვედრა ემსახურება მცდელობას, რომ კიდევ ერთხელ დაფიქსირდეს თუ რა მიმართულებით არის შესაძლებელი, გადაიდგას ნაბიჯები კონსენსუსისკენ. ის პროდუქტი, რაც აქამდე მივიღეთ, აბსოლუტურად დაცლილია კონსენსუსისგან და ძალიან დაბალი ლეგიტიმაციის მქონეა, ამაზე მგონი აღარავინ დაობს, განსაკუთრებით საერთაშორისო შეფასებების შემდეგ. ამიტომ ძალიან მნიშვნელოვანია, რომ თუ ჩვენ გვინდა ამ პროცესს ჰქონდეს მაღალი ლეგიტიმაცია, თუ ჩვენ გვინდა, პროცესი იყოს კონსენსუსის შედეგზე დამყარებული, უნდა გაჩერდეს ის, რაც აქამდე იყო და უნდა დაიწყოს დიალოგის ახალი ფორმატი, რომელიც ადეკვატურად უპასუხებს იმ მოთხოვნებს, რომელიც არის როგორც ქართული საზოგადოების, ისე საერთაშორისო საზოგადოების მხრიდან“, - განუცხადა ჟურნალისტებს ჩიხრაძემ.