პოლიტიკა

საკონსტიტუციო სასამართლოს არ უთქვამს, რომ ხდება ლეგალიზაცია და მისი გადაწყვეტილებიდან ეს არ გამომდინარეობს - ანა ნაცვლიშვილი

პრეზიდენტის საპარლამენტო მდივნის, ანა ნაცვლიშვილის განცხადებით, მარიხუანის მოხმარებასთან დაკავშირებით საკონსტიტუციო სასამართლოს გადაწყვეტილების მიზანმიმართული არასწორი ინტერპრეტაცია ხდება და საღდება, როგორც ნარკოტიკების ლეგალიზაცია.

„ეს არის არასწორი ინფორმაციის მიზანმიმართულად გავრცელება. საკონსტიტუციო სასამართლოს არ უთქვამს, რომ ხდება ლეგალიზაცია და მისი გადაწყვეტილებიდან ეს არ გამომდინარეობს. საკონსტიტუციო სასამართლომ თქვა, რომ ადამიანის დასჯა ამ ნივთიერების მოხმარებისთვის არ არის სწორი. ეს არის ჯანსაღი, ადამიანზე ორიენტირებული პოზიცია“, – განმარტა ნაცვლიშვილმა.

ნაცვლიშვილმა აღნიშნა, რომ არაა დასჯის მომხრე, თუმცა არ ემხრობა ნარკოდამოკიდებულებას.

„არანაირ ნივთიერებაზე დამოკიდებულება არ არის მოსაწონი, ნებისმიერი დამოკიდებულება ზღუდავს ყველაზე ძვირფასს, რაც ადამიანს აქვს, ეს არის მისი თავისუფლება“, – განაცხადა პრეზიდენტის საპარლამენტო მდივანმა.

ნაცვლიშვილის თქმით, მნიშვნელოვანია, სახელმწიფო არ იყოს ორიენტირებული მოქალაქეთა დასჯაზე, მაგრამ აქტიურად იმუშაოს მათთვის ჯანსაღი ცხოვრების შესაძლებლობების შესათავაზებლად, განსაკუთრებით ახალგაზრდების შემთხვევაში.

„ამას სჭირდება სახელმწიფოს აქტიური ჩართულობა. მათ სჭირდებათ, დაინახონ ალტერნატივა, მაგრამ თუ ადამიანები გადაწყვეტენ, რომ სურთ ამ ნივთიერების მოხმარება, ამისთვის სახელმწიფო არ უნდა სჯიდეს“, – განაცხადა ნაცვლიშვილმა.

მან ასევე აღნიშნა, რომ პრეზიდენტი მუდმივად ხაზს უსვამს, რომ არ შეიძლება და არ არის სწორი, ადამიანები მარიხუანას მოხმარებისთვის ისჯებოდნენ.