სამართალი

საკონსტიტუციო სასამართლო პარლამენტის წინააღმდეგ მოქალაქის სარჩელს განიხილავს

საკონსტიტუციო სასამართლოს პირველი კოლეგია პარლამენტის წინააღმდეგ მოქალაქე გიორგი ლოგუას სარჩელს განიხილავს.

დავის საგანია საქართველოს სისხლის სამართლის კოდექსის 255-ე მუხლის პირველი ნაწილის სიტყვები: „პორნოგრაფიული ნაწარმოების, ნაბეჭდი გამოცემის, გამოსახულების ან პორნოგრაფიული ხასიათის სხვა საგნის უკანონოდ“ გავრცელება ან რეკლამირება.

გიორგი ლოგუა სადავოდ ხდის პორნოგრაფიული ნაწარმოების, ნაბეჭდი გამოცემის, გამოსახულების ან პორნოგრაფიული ხასიათის სხვა საგნის უკანონო დამზადების, გავრცელების ან რეკლამირების, ასეთი საგნით ვაჭრობის ან/და მისი შენახვისთვის, გაყიდვის ან გავრცელების მიზნით დაწესებულ სისხლის სამართლებრივ პასუხისმგებლობას.

ამის შესახებ საკონსტიტუციო სასამართლოს პრესსამსახურის მიერ გავრცელებულ ინფორმაციაშია ნათქვამი, რომელიც სასამართლოს ვებ-გვერდზე განთავსდა.

მოსარჩელის მტკიცებით, სადავო ნორმა ეწინააღმდეგება საქართველოს კონსტიტუციით განმტკიცებულ ინფორმაციის და გამოხატვის თავისუფლების უფლებას.

მოსარჩელის განმარტებით, გასაჩივრებული ნორმა ბუნდოვანია და ვერ აკმაყოფილებს განჭვრეტადობის პრინციპის მოთხოვნებს, ვინაიდან საქართველოს კანონმდებლობა არ განსაზღვრავს პორნოგრაფიის ცნებას და იმას, თუ რა გზით არის შესაძლებელი ამგვარი ნაწარმოების კანონიერად დამზადება, გავრცელება, რეკლამირება, შენახვა ან და ასეთი საგნით ვაჭრობა.

მონიკა დავლიანიძე