პოლიტიკა

საკონსტიტუციო სასამართლო ე.წ. ნარკოტესტირებასთან დაკავშირებით ომბუდსმენის სარჩელს განიხილავს

საკონსტიტუციო სასამართლოს პირველმა კოლეგიამ სახალხო დამცველის საჩივრის განხილვა დაიწყო. ომბუდსმენი მოითხოვს, რომ ანტიკონსტიტუციურად გამოცხადდეს ნარკოტიკული საშუალების მოხმარებასთან დაკავშირებული სამართალდარღვევის დადგენის წესის, ე.წ. ნარკოტესტირების პროცედურების განმსაზღვრელი საკანონმდებლო რეგულაციები.

სახალხო დამცველის წარმომადგენლის, მიხეილ შარაშიძის განცხადებით, ნარკოტესტირება პრობლემური პროცედურაა, რომელიც ბუნდოვან განსაზღვრებებს ეფუძნება.

„არსებობს სამი პირობა, რომელიც 2015 წელს განისაზღვრა: როდესაც ე.წ საპოლიციო რეიდები ტარდება და პირი უარს აცხადებს დაემორჩილოს პოლიციელის მოთხოვნას. ამავე დროს, პოლიციელს აქვს იმის ეჭვი, რომ შეიძლება პირი ნარკოტიკული თრობის ქვეშ იყოს, ან მას ნარკოტიკული ნივთიერება მოხმარებული ჰქონდეს. მესამე პრინციპის მიხედვით, როდესაც 112-ის საშუალებით შესულია შეტყობინება, რომ პირმა ნარკოტიკული საშუალება მოიხმარა. ჩვენ მიგვაჩნია, რომ სამივე მიდგომა არაკონსტიტუციურია. იმ შემთხვევაშიც კი, თუ ამ პირობებს აქვს ადგილი, არ შეიძლება საფუძველი გახდეს იმისა, რომ პირს 12 საათის განმავლობაში თავისუფლების აღკვეთა შეეზღუდოს. მიგვაჩნია, რომ ეს სერიოზული პრობლემური პროცედურაა“, - განაცხადა შარაშიძემ.

ანა მებურიშვილი