პოლიტიკა

საკონსტიტუციო სასამართლო არ ამბობს, რომ მოსმენების გასაღები ხელისუფლების ხელში არ უნდა იყოს - ეკა ბესელია

სახელმწიფო უსაფრთხოების სამსახურის დაქვემდებარებაში სსიპ-ის შექმნა, საკონსტიტუციო სასამართლოს გადაწყვეტილებასთან წინააღმდეგობაში არ იქნება, - განუცხადა ჟურნალისტებს პარლამენტის იურიდიულ საკითხთა კომიტეტის თავმჯდომარემ ეკა ბესელიამ ჟურნალისტებს ფარულ მოსმენებთან დაკავშირებულ იმ მოდელზე საუბრისას, რომელიც გუშინ სამუშაო ჯგუფის დახურულ სხდომაზე განიხილეს.

როგორც ბესელიამ ამასთან დაკავშირებით განმარტა, საკონსტიტუციო სასამართლო არ ამბობს, რომ მოსმენების გასაღები ხელისუფლების ხელში არ უნდა იყოს.

მისი თქმით, სასამართლო საკუთარ გადაწყვეტილებაში შესაბამისი ორგანოს დამოუკიდებლობის მაღალ გარანტიებზე საუბრობს და ამბობს, რომ მას გამოძიების ფუნქცია არ უნდა ჰქონდეს, რაც გათვალისწინებული იქნება.

“სამუშაო ჯგუფში ჯერჯერობით სამი პოზიცია გამოიკვეთა. ის, რაც აქვს “ეს შენ გეხებას“, რომ შეიქმნას სრულიად დამოუკიდებელი უწყება და დაექვემდებაროს პარლამენტს. არის მეორე ვერსია, რაზეც ჩვენ უფრო ვჯერდებით და ვთავაზობთ მოდელს, რომ გავიზიაროთ კონტროლის რამდენიმე დონის ეტაპი. ჩვენი ხედვით დაახლოებით ექვსი დონის კონტროლი შემოდის, თუმცა არა პარლამენტის დაქვემდებარების ქვეშ, რადგან ასეთი მოდელი არც ერთ ქვეყანას არ აქვს. უფრო იმ კონსენსუსის გზით უნდა ვიაროთ, რომ ეს იყოს აღმასრულებელი ხელისუფლების ქვეშ და იყოს სსიპ-ის ფორმით, რაც არის დამოუკიდებლობის უფრო მაღალი ხარისხი, მაგრამ უსაფრთხოების სამსახურთან, რომელსაც აქვს ქვეყნის უსაფრთხოებაზე უპირველესი პასუხისმგებლობა. ეს იქნება მაღალი დონის კონტროლის მექანიზმით - მათ შორის რჩება სასამართლო, რჩება პერსონალურ მონაცემთა დაცვის ინსპექტორი, ემატება პარლამენტი ცალკე ბიუჯეტით, მაქსიმალური გარანტიებით. არის კიდევ ერთი მოსაზრება, რომ შეიძლება კიდევ უფრო სხვა მოდელზე იყოს საუბარი, თუმცა შევთანხმდით, რომ გავაგრძელოთ უწყებებთან დამატებითი კონსულტაციები. აქ ყველა მხარეა ჩართული და საბოლოოდ ერთიან პოზიციაზე შევჯერდებით“, - განუცხადა ჟურნალისტებს ბესელიამ.

მისივე ინფორმაციით, დაახლოებით 30 იანვარს კონკრეტული კანონპროექტი მზად იქნება.

ნინო ექვთიმიშვილი