პოლიტიკა

საკონსტიტუციო კომისიის მუშაობაში ჩართვა მინდოდა იმ მანდატით, რომელიც მაქვს ხალხის სახელით - გიორგი მარგველაშვილი

ჩემი მიზანი იყო, რომ კონსტიტუციაზე მუშაობაში ხალხი ყოფილიყო ჩართული და მე ამას ვახორციელებ, - აცხადებს საქართველოს პრეზიდენტი, გიორგი მარგველაშვილი საპარლამენტო უმრავლესობის იმ წევრების საპასუხოდ, რომლებიც კონსტიტუციის გადახედვასთან დაკავშირებით მის კამპანიას აკრიტიკებენ.

მარგველაშვილი საზოგადოებას მოუწოდებს, აქტიურად ჩაერთონ კონსტუტუციის განხილვის პროცესში

” ეს პროცესი არის კონსტიტუციის სულისკვეთებაზე. იმის შესახებ, თუ რა გვსურს ვიხილოთ კონსტიტუციაში. რა თქმა უნდა, ჩვენ არ განვიხილავთ არც არსებულ კონსტიტუციას, არც სხვა მოდელს, ჩვენ ვსაუბრობთ იმის თაობაზე, თუ როგორ შევქმნათ უფრო ერთიანი, უფრო ძლიერი, უფრო სამართლებრივი სახელმწიფო.

კომისიის თაობაზე განცხადება უკვე გაკეთებული მაქვს, განმარტებული მაქვს მიზეზი, რატომაც მინდოდა თანათავმჯდომარეობა. თანაავმჯდომარეობა მინდოდა იმიტომ, რომ საზოგადოება ჩამერთო ამ პროცესში. ამას ვაკეთებ კიდეც. მე კომისიის მუშაობაში მინდოდა ჩართვა არა მარტო ჩემი პოზიციიდან გამომდინარე, არამედ იმ მანდატით, რომელიც მაქვს - ხალხის სახელით, და მე ამას ვაკეთებ. დღეს ისმის ხალხის ხმა. სახელმწიფო საკონსტიტუციო კომისიის წევრები ამ ხალხის ხმას ისმენენ უშუალოდაც და მედიის მეშვეობითაც, რა მიზანიც მქონდა, რომ ხალხი ყოფილიყო ამ პროცესში ჩართული და პროცესი არ წარმართულიყო დახურულ კარს მიღმა. ამას მე ვახორციელებ ქართველ ხალხთან ერთად”, - განაცხადა გიორგი მარგველაშვილმა.

ნინო ექვთიმიშვილი