პოლიტიკა

საკონსტიტუციო კომისიაში ადგილობრივი „სტრასბურგის სასამართლოს“ მოდელზე მსჯელობენ

საკონსტიტუციო კომისიის დღევანდელი სხდომის ერთ-ერთი განსახილველი საკითხია საკონსტიტუციო სასამართლოს უფლებამოსილებების გაზრდა.

კონსტიტუციონალისტი ვახუშტი მენაბდის თქმით, ინიციატივის მიხედვით, საკონსტიტუციო სასამართლოს ექნება მინი-სტრასბურგის ფუნქცია, რომელიც მისცემს მას საშუალებას, გადახედოს საერთო სასამართლოების მიერ მიღებულ გადაწყვეტილებებს.

„კიდევ ერთი მნიშვნელოვანი საკითხია საკონსტიტუციო სასამართლოსთვის უფლებამოსილების მინიჭება, რომ მან გადასინჯოს და დაადგინოს საერთო სასამართლოების მიერ მიღებული გადაწყვეტილებების კონსტიტუციურობა, რაც ვფიქრობ, რომ ძალიან კარგი ცვლილება იქნება, თუმცა კომისიის ზოგიერთ წევრს მიაჩნია, რომ ეს გამოიწვევს და გააჩენს საჭიროებას, რომ საკონსტიტუციო სასამართლოს მოსამართლეთა რაოდენობა გაიზარდოს“, - თქვა მენაბდემ.

მისი თქმით, მსგავსი მოდელის შემოღება შეამცირებს სარჩელების რაოდენობას ევროსასამართლოში.

„ეს კი შეიძლება იყოს მინი-სტრასბურგის მოდელი, ადგილობრივი სტრასბურგის მოდელი, რაც ქვეყანას დაეხმარება, რომ შეამციროს სარჩელების რაოდენობა ადამიანთა უფლებების ევროპულ სასამართლოში“, - განაცხადა მენაბდემ.

დღეს საკონსტიტუციო კომისიაში განიხილავენ სასამართლო ხელისუფლების ფორმირების საკითხს, კერძოდ, რა კრიტერიუმს უნდა აკმაყოფილებდეს და როგორ უნდა დაინიშნოს მოსამართლე. გარდა ამისა, იმსჯელებენ ომბუდსმენის არჩევის წესზე.

ანა მებურიშვილი