სამართალი

საკონსტიტუციო კომისია საპარლამენტო რესპუბლიკის მოდელზე მსჯელობს

საკონსტიტუციო ცვლილებებზე მომუშავე სახელმწიფო კომისია საპარლამენტო რესპუბლიკაზე გადასვლის მოდელზე მსჯელობს.

როგორც კომისიის წევრების შეხვედრის დაწყებამდე საპარლამენტო უმრავლესობის წევრმა დავით მათიკაშვილმა მედიას განუცხადა, თუ კომისიის წევრები შეჯერდებიან იმაზე, რომ საქართველო საპარლამენტო რესპუბლიკა უნდა გახდეს, პრეზიდენტის არჩევის წესიც გადაიხედება.

„ვთანმხდებით, რომ ეს წესი, ეს ფორმატი უნდა იყოს საპარლამენტო. თუმცა, მუშაობის პროცესში ეს საკითხი დინამიკაში ვითარდება და ახლა საბოლოო გადაწტყვეტილება არ არის. თუმცა, ყველა გამოკვეთილი მიმართულება, საპარლამენტო რესპუბლიკისკენ მიდის, ცხადია“,-აღნიშნა მათიკაშვილმა.

კითხვაზე, საპარლამენტო რესპუბლიკაზე გადასვლა გულისხმობს, თუ არა რომ პრეზიდენტს ხალხი არ უნდა ირჩევდეს, დეპუტატი პასუხობს, რომ ეს ამას „ერთმნიშვნელოვნად არ გულისხმობს“.

„არა, საპარლამენტო რესპუბლიკა მაგას ცხადია ერთმნიშნელოვნად არ გულისხმობს. თუმცა ჩვენ ვიღებთ საუკეთესო პრაქტიკას, გამოცდილებას და იმ კონკრეტულ ვითარებას, რომელიც არსებობს მსოფლიოს წამყვან ქვეყნებში. მათგან უმეტესობაში სწორედ არაპირდაპირი წესით ხდება არჩევა“,-აღნიშნა დეპუტატმა.

მონიკა დავლიანიძე