პოლიტიკა

საკითხის სიმძიმიდან გამომდინარე, კიდევ უფრო აქტიურად ვმუშაობთ მოსკოვის გამზირისთვის სახელის შეცვლაზე - საკრებულოს გამოხმაურება

თბილისის საკრებულოს სახელდებისა და სიმბოლიკის კომისიის თავმჯდომარე, თინათინ ნიბლოშვილი გამოეხმაურა ფრაქცია „ერთიანი ნაციონალური მოძრაობის“ ინიციატივას მოსკოვის გამზირისთვის სახელის შეცვლის შესახებ. დეპუტატის თქმით, ამაზე მსჯელობა ტატუნაშვილის გარდაცვალებამდე დიდი ხნით ადრე დაიწყო.

ნიბლოშვილის განმარტებით, გამზირისთვის სახელის გადარქმევას შესაბამისი პროცედურების გავლა სჭირდება, ასევე გასათვალისწინებელია იმ ათასობით ადამიანის პოზიცია, რომელიც აღნიშნულ გამზირზე ცხოვრობს.

„საკითხის სიმძიმიდან გამომდინარე, კიდევ უფრო აქტიურად ვმუშაობთ მოსკოვის გამზირისთვის სახელის შეცვლაზე. გვაქვს გარკვეული ვერსიები. რაც შეეხება გმირებს, 2008 წლიდან დაწყებული, რუსულ აგრესიას ძალიან ბევრი ქართველის სიცოცხლე შეეწირა და თბილისში ამ გმირების სახელობის უკვე ათობით ქუჩა გვაქვს“, - განაცხადა ნიბლოშვილმა.

ცნობისთვის, საზოგადოების ნაწილი ითხოვს თბილისში, მოსკოვის გამზირს სახელი გადაერქვას და არჩილ ტატუნაშვილის სახელობის გამზირი ეწოდოს.

შესაბამისი პეტიცია Manifest.ge-ზე გამოქვეყნდა.

,,მოსკოვის გამზირს დაერქვას არჩილ ტატუნაშვილის სახელი.

არჩილ ტატუნაშვილის ქუჩა, ყველაზე ლამაზი გახდება მთელს დედაქალაქში და იქნება სიმბოლო იმისა, თუ როგორ ლამაზდება ჩვენი ქვეყანა მაშინ როცა მოსკოვის გავლენიდან გამოდის“, - ნათქვამია პეტიციის ტექსტში.