პოლიტიკა

სახელმწიფოს ცნების განსაზღვრის გარეშე ვერ ჩამოვყალიბდებით ტოლერანტულ ქვეყნად, ეს ერის კოლაფსი იქნება - პრეზიდენტი

საქართველოს პრეზიდენტის, გიორგი მარგველაშვილის განცხადებით, თუ არ მოხდება სახელმწიფოს ცნების განსაზღვრა, საქართველო ვერ ჩამოყალიბდება ტოლერანტულ ქვეყნად. ამის შესახებ პრეზიდენტმა თბილისის საერთაშორისო კონფერენციის გახსნისას თქვა.

„მე დღეს არ ვისაუბრებ, ვინ ვიყავით ჩვენ. საქართველოსთვის ევროპული, დასავლური ფასეულობები, მათი ცივილიზაცია ჩვენი კულტურის ნაწილიც იყო. ინდივიდუალიზმი, ფასეულობები, ადამიანის უფლება გამოხატოს საკუთარი თავი საზოგადოებაში. ამ ყველაფრის ნაწილი საქართველოც იყო. ვიყავით ქვეყანა, რომელიც საკუთარ თავს იცავს. გამოწვევა არის ის, რომ გავიზარდოთ ინდივილუალობაზე დაფუძნებულ ქვეყნად. თუ არ მოხდება სახელმწიფოს ცნების განსაზღვრება, ვერ ვისწავლით განსხვავებების მიღებას, არ ვიქნებით ტოლერანტულები სხვა ადამიანების მიმართ, ვერ ჩამოვყალიბდებით ასეთ ქვეყნად.

ოლერანტობა ჩვენი კულტურის ნაწილია. საქართველოში არის ის კულტურა, სადაც პატივს სცემენ ტოლერანტობას. ჩვენ უნდა მივიღოთ ის ფაქტი, რომ სხვა ადამიანებიც ამ კულტურის ნაწილი არიან, რელიგიური, ეთნიკური, განსხვავებული სექსუალური ორიენტაციის მიუხედავად. თუ ამას ვერ მივიღებთ, ვერ დავინახავთ განსხვავებებს, ეს იქნება ჩვენი ერის კოლაფსი“, - განაცხადა პრეზიდენტმა.

ანა მებურიშვილი