სამართალი

სახელმწიფომ უკვე განახორციელა ნაბიჯები, რომ ბატონი ცერცვაძის ინტერესები იქნას უკრაინის ტერიტორიაზე დაცული - თეა წულუკიანი

საქართველოს იუსტიციის მინისტრის თეა წულუკიანის განცხადებით, საქართველოს მთავრობა, ვიცე-პოლკოვნიკ გიორგი ცერცვაძესთან დაკავშირებით უკრაინის მხარესთან თანამშრომლობს, რათა ცერცვაძის ინტერესები იყოს დაცული.

მინისტრი უმორჩილესად თხოვს საზოგადოებას, მედიას, რომ ამ თემის ირგვლივ ნაკლები აჟიოტაჟი მოხდეს, რადგან ყოველივე ეს გიორგი ცერცვაძის ინტერესებს არ ემსახურება.

ამის შესახებ წულუკიანმა მთავრობის დღვანდელი სხდომის დასრულების შემდეგ მედიას განუცხადა.

„ერთადერთი შემიძლია გითხრათ, რომ ჩვენმა სახელმწიფომ ისე, რომ სხვათაშორის, ხმამაღლა მყვირალი ზოგიერთი ადამიანის მოწოდება არ გვჭირდება ამისთვის, უკვე განახორციელა ნაბიჯები, რომ ჩვენი მოქალაქის, ბატონი ცერცვაძის ინტერესები იქნას უკრაინის ტერიტორიაზე დაცული. ეს არის ის, რაც ამ წუთში მე შემიძლია გითხრათ ისევ და ისევ მოქალაქე ცერცვაძის ინტერესებიდან გამომდინარე. ჩემი და მთავრობის მთელი სამართალდამცავი ბლოკის უმორჩილესი თხოვნა იქნებოდა, რომ რაც შეიძლება თავი შევიკავოთ აჟიოტაჟისგან ამ თემის გარშემო, რადგან ეს არ ემსახურება თვითონ მოქალაქე ცერცვაძის სასიცოცხლო ინტერესებს. თანამშრომლობა მიმდინარეობს უკრაიანასთან და დაველოდოთ შედეგებს“, - განაცხადა იუსტიციის მინისტრმა თეა წულუკიანმა მთავრობის სხდომის შემდეგ.

მინისტრმა ასევე აღნიშნა, რომ იუსტიციის სამინისტროში ყველა ადამიანის პირადი მონაცემი დაცულია.

„სრული პასუხისმგებლობით შემიძლია გითხართ, რომ იუსტიციის სამინისტროს სისტემაში თითოეული ადამიანის, მათ შორის მოქალაქე ცერცვაძის პირადი მონაცემები არის მკაცრად დაცული, მასზე ხელი არ მიუწვდება არავის, გარდა კანონით განსაზღვრული შემთხვევისა. შესაბამისად, არც ერთ პირად მონაცემზე, რომელიც შეიძლება ჩვენს სისტემაში ინახებოდეს, მითუმეტეს ხელი არ მიუწვდება ოკუპანტ ქვეყანას“, - განაცხადა წულუკიანმა.

მონიკა დავლიანიძე