პოლიტიკა

სახელმწიფო ჯილდოების შესახებ კანონის პროექტში ცვლილებები შედის

საქართველოს კანონის პროექტში „საქართველოს სახელმწიფო ჯილდოების შესახებ“ ცვლილებები შედის, - განაცხადა საქართველოს პრემიერ-მინისტრმა გიორგი კვირიკაშვილმა მთავრობის დღევანდელ სხდომაზე.

როგორც პრემიერმა აღნიშნა, კანონპროექტში ასევე გათვალისწინებულია ეროვნული გმირის ორდენზე ფულადი ჯილდოს ოდენობის გაზრდა.

„ასევე ერთი საკითხი გახლავთ ვაჟა- ფშაველას პრემიის დაწესებასთან დაკავშირებით. მივიღეთ გადაწყვეტილება, რომ მთავრობის სხდომაზე დასამტკიცებლად გამოვიტანოთ ცვლილებათა პაკეტი „სახელმწიფო ჯილდოების შესახებ“ კანონში, რომელიც ითვალისწინებს ლიტერატურის დარგში პროზის, პოეზიისა და პუბლიცისტიკის ისეთი უმნიშვნელოვანესი ნაწარმოებებისთვის, რომლებიც შეიძენენ და მიიღებენ ეროვნულ აღიარებას, შესაძლებლობა იყოს, რომ ისინი წარდგენილი იქნას ვაჟა ფშაველას სახელობის პრემიაზე“, - განაცხადა კვირიკაშვილმა.

მისივე თქმით, ასევე გაიყოფა შოთა რუსთაველის სახელობისა და ეროვნული პრემიები.

„ვფიქრობთ, რომ შოთა რუსთაველის პრემია იყოს ლიტერატურის დარგში, ხელოვნებისა და არქიტექტურის დარგებში, ხოლო მეცნიერებისთვის იყოს კონკრეტულად ეროვნული პრემია, რაც მეცნიერების მიმართულებით კიდევ უფრო წაახალისებს უმაღლესი ჯილდოსთვის ბრძოლას, მუშაობას და ჩვენი მეცნიერების განვითარებას. კანონპროექტში ასევე გათვალისწინებულია ეროვნული გმირის ორდენზე ფულადი ჯილდოს ოდენობის გაზრდა“, - განაცხადა კვირიკაშვილმა.