პოლიტიკა

სახელმწიფო დაზვერვის სამსახური ვიზალიბერალიზაციის პროცესზე მუშაობს იმისათვის, რომ გატარდეს პრევენცია - უწყების ხელმძღვანელი

საქართველოს სახელმწიფო დაზვერვის სამსახურის უფროსის, დავით სუჯაშვილის განცხადებით, აღნიშნული უწყება უვიზო მიმოსვლის საკითხზე პარტნიორი ქვეყნების სპეცსამსახურებთან თანამშრომლობს.

„ჩვენ ვიზალიბერალიზაციის პროცესში აქტიურად ვართ ჩართულები. ძალიან მჭიდრო ურთიერთობა გვაქვს ჩვენი პარტნიორი ქვეყნების სპეცსამსახურებთან. ჩვენი სამსახური მუშაობს იმისათვის, რომ გატარდეს პრევენცია“, - უთხრა სუჯაშვილმა ჟურნალისტებს თავდაცვისა და უშიშროების საპარლამენტო კომიტეტის დახურულ სხდომაზე ანგარიშის წარდგენის შემდეგ.

სუჯაშვილმა აღნიშნა, რომ დეპუტატებს დახურულ სხდომაზე ამომწურავი ინფრომაცია მიაწოდა.

„აქ მუშაობენ ის ადამიანები, რომლებიც იღებენ გადაწყვეტილებებს, ამ გადაწყვეტილებების საფუძველზე მოძრაობს ჩვენი ქვეყანა. ჩვენი სამსახურის მიზანია, მათ ინფორმაცია მივაწოდოთ, რის საფუძველზეც ისინი გადაწყვეტილებებს მიიღებენ.

ბუნებრივია, რომ მსგავსი ბრიფინგები დამატებით კითხვების სურვილს იწვევს, თუმცა ამ ფორმატში არ შეგვეძლო დეტალებზე გვესაუბრა. მე კმაყოფილი ვარ დეპუტატების კითხვებით“, - განაცხადა სუჯაშვილმა.