სამართალი

სახალხო დამცველი მოუწოდებს პროკურატურას, დაუყოვნებლივ დაიწყოს გამოძიება მოზარდების მკვლელობაში სხვა მონაწილე დამნაშავეების გამოსავლენად

ხორავას ქუჩაზე მოკლული მოსწავლეების საქმის მასალებს სახალხო დამცველი შეისწავლის.

როგორც ნინო ლომჯარიამ აღნიშნულ საქმესთან დაკავშირებით გამართულ ბრიფინგზე განაცხადა, სახალხო დამცველის აპარატი გამოითხოვს გამოძიების მასალებს და სრულყოფილად შეისწავლის მას.

ომბუდსმენის განცხადებით, სასამართლოს დღევანდელი გადაწყვეტილება ადასტურებს გამოძიების პროცესში წარმოქმნილ ეჭვებს.

„სასამართლოს გამოტანილი განაჩენი ადასტურებს მომხდარი ტრაგედიის შემდეგ წარმოშობილ ეჭვებს, რომ გამოძიებამ გარდაცვლილი სარალიძის მკვლელობაში დამნაშავე პირები სრულად ვერ გამოავლინა.

მიუხედავად იმისა, გამოძიების მიმდინარეობისას დაზარალებული მხარე აღნიშნულ გარემოებაზე ღიად აპელირებდა, გამოძიება სხვა პირების მიერ მკვლელობის ფაქტზე დღემდე არ დაწყებულა და პროკურატურა ფაქტობრივად გამორიცხავდა მკველელობაში სხვა პირების მონაწილეობას,“-განაცხადა ნინო ლომჯარიამ.

სახალხო დამცველი მოუწოდებს პროკურატურას, დაუყოვნებლივ დაიწყოს გამოძიება მკვლელობაში სხვა მონაწილე დამნაშავეების გამოსავლენად.

ნინო ლომჯარიას თქმით, ამ მიმართულებით გამოძიების დაწყების საფუძველი უკვე არსებობდა, ვინაიდან სასამართლო სხდომაზე გამოკვლეული ექსპერტიზის დასკვნით, დავით სარალიძის სასიკვდილო ჭრილობა არ იყო მიყენებული გამოძიების მიერ მოპოვებული იარაღით.

ომბუდსმენს კითხვები აქვს დანაშაულის დაფარვის და შეუტყობინებლობის ფაქტებზე გამოძიებასთან დაკავშირებით. ნინო ლომჯარია ინტერესდება რამდენად სრულყოფილია ამ მუხლით ბრალდებული პირების სია.

ნინო ექვთიმიშვილი