პოლიტიკა

საინგილოში, ქურმუხის წმინდა გიორგის ეკლესიაში გადაღებული ვიდეო მკრეხელური შინაარსისაა - საპატრიარქო

საქართველოს საპატრიარქო შეშფოთებულია აზერბაიჯანული ტელეკომპანია „arb“-იზე გასული გადაცემით, რომელიც საინგილოში, კახის რაიონში მდებარე ქურმუხის წმინდა გიორგის ეკლესიაში იყო გადაღებული. საპატრიარქოს შეფასებით, ეს ვიდეო ძეგლის შეურაცხყოფაა.

„გამოვთქვამთ ჩვენს გულისტკივილს იმ დამოკიდებულების გამო, რაც საინგილოში, კახის რაიონში, მდებარე ქურმუხის წმინდა გიორგის ეკლესიის მიმართ განხორციელდა,კერძოდ, საპატრიარქოს ინფორმაციით, აზერბაიჯანული გასართობი ტელეკომპანია arb-ის ეთერში გავიდა გადაცემა „ფერნანდო ქალაქშია“, რომლის ერთ-ერთი სიუჟეტი გადაიღეს ქურმუხის ტაძარში, სადაც ახალგაზრდა მამაკაცი ტაძრის საკურთხეველში შეუფერებელი მანერით „ასრულებს“ შუბერტის „ავე მარიას“, - წერია საპატრიარქოს განცხადებაში.

საპატრიარქოს თქმით, ეს პირველი შემთხვევა არ არის, როცა ეკლესიას უდიერად ეპყრობიან. როგორც განცხადებაში წერია,მკრეხელური შინაარის კლიპი ქურმუხის ეკლესიაში 2015 წელს გადაუღიათ.

საპატრიარქო მოუწოდებს აზერბაიჯანის ხელისუფლებასა და მისი ქვეყნის სულიერ ლიდერს, რეაგირება მოახდინონ ამ ფაქტზე.

„მივმართავთ აზერბაიჯანის ხელისუფალთ და ვთხოვთ სულიერ ლიდერს, მის აღმატებულება შეიხ ულ-ისლამ ალაჰ შუქურ ფაშა-ზადეს, დროულად მოხდეს ფაქტების მოკვლევა და სათანადო ზომების მიღება არსებული დამოკიდებულების აღმოსაფხვრელად.

ვიმედოვნებთ, ჩვენს ქვეყნებსა და რელიგიურ ლიდერთა შორის არსებული მეგობრული დამოკიდებულება მდგომარეობის დროულად გამოსწორების წინაპირობა იქნება“, - ნათქვამია საქართველოს საპატრიარქოს განცხადებაში.

ანა მებურიშვილი