სამართალი

საიამ, შესაძლოა, ცესკოს გადაწყვეტილება გაასაჩივროს

„ახალგაზრდა იურისტთა ასოციაციამ“, შესაძლოა, ცენტრალური საარჩევნო კომისიის გადაწყვეტილება სასამართლოში გაასაჩივროს.

ცესკომ 29 სექტემბერს თბილისში ჩატარებულ საქველმოქმედო მატჩში, კერძოდ, ფეხბურთელ ანდრეი შევჩენკოს განცხადებაში პოლიტიკური აგიტაციის ნიშნები ვერ აღმოაჩინა.

„როგორც კი შევჩენკოს კომენტარი გავრცელდა, რომ ის კახა კალაძის მხარდასაჭერად იყო ჩამოსული და მიიჩნევდა, რომ კალაძე კარგი მერი იქნებოდა, მივმართეთ ცესკოს. ჩვენ ვაფასებთ ამ შემთხვევას როგორც სააგიტაციო ღონისძიებას. ადგილი ჰქონდა სწორედ უკანონო აგიტაციას იქედან გამომდინარე, რომ უცხო ქვეყნის მოქალაქე მონაწილეობდა აგიტაციაში. ჩვენი კანონმდებლობით აგიტაცია არის ნებისმიერი საჯარო მოქმედება რომლითაც ხელი ეწყობა ან ხელი ეშლება კანდიდატის არჩევას. ამ შემთხვევაში ადგილი ჰქონდა ხელშეწყობას“, - თქვა საიას იურისტმა ირმა პავლიაშვილმა.

პავლიაშვილმა აღნიშნა, რომ საიასთვის მნიშვნელოვანია სასამართლოს პოზიციის გაგება ამ ფაქტზე.

„ჩვენთვის საინტერესოა, როგორი იქნება სასამართლოს პასუხი. ჩვენთვის მნიშვნელოვანია, სასამართლოს განმარტება როგორი იქნება უკანონო აგიტაციის შემთხვევებზე. ჩვენთვის საინტერესოა დავინახოთ იმ სამართლებრივ ჩარჩოსთან ერთად თუ რა პრაქტიკის დამკვიდრება ხდება“, - თქვა საიას იურისტმა.

პავლიაშვილის განცხადებით, ორგანიზაციამ 2016 წელსაც მიმართა ცესკოსა და სასამართლოს, როდესაც უკრაინის მოქალაქე მიხეილ სააკაშვილი ჩაერთო აგიტაციაში და ადგილი ჰქონდა სოციალურ მიმართვებს.

შეგახსენებთ, 29 სექტემბრის შეხვედრის შემდეგ ანდრეი შევჩენკომ განაცხადა, რომ „ჩემს მეგობარ კახი კალაძეს წარმატებას გულით ვუსურვებ. დარწმუნებული ვარ, ის კარგი მერი იქნება“. ასევე იტალიური კლუბ მილანის ყოფილმა კაპიტანმა, პაოლო მალდინიმ საკუთარ ინსტაგრამზე გამოაქვეყნა ფოტო წარწერით: „ლეგენდები თბილისში კახა კალაძისთვის“.

დღეს ცესკოს თავმჯდომარემ, თამარ ჟვანიამ განაცხადა, რომ არც შევჩენკოს ნათქვამში და არც პაოლო მალდინის წარწერაში საარჩევნო კამპანიის წესების დარღვევა არ ვლინდება.