პოლიტიკა

საია ტელეკომპანია „იბერიას“ საქმეზე სახელმწიფო დაწესებულებებს მიმართავს დამატებითი ინფორმაციისთვის - სულხან სალაძე

„ისეთი განცდა მაქვს, ამ ქვეყანაში არავის არ ეპარება ეჭვი, რომ ხელისუფლებას სურდა ტელეკომპანია „იბერია" და კონტრიბუცია, - ამის შესახებ ჟურნალისტებს ტელეკომპანია „იბერიის" საინფორმაციოს ხელმძღვანელმა ვახო ხუზმიაშვილმა განუცხადა, სადაც არხის ხელმძღვანელობისა და არასამთავრობო ორგანიზაციების წარმომადგენლების შეხვედრა დასრულდა.

ტელეკომპანიის ხელმძღვანელებმა არასამთავრობო სექტორს არხზე წარმოქმნილი პრობლემების შესახებ ინფორმაცია დახურულ კარს მიღმა გამართულ შეხვედრაზე მიაწოდეს.

ხუზმიაშვილის თქმით, არასამთავრობო ორგანიზაციების წარმომადგენლებმა მათ დახმარება აღუთქვეს და აღნიშნეს, რომ მნიშვნელოვანია, არ მოხდეს „იბერიის" მაუწყებლობის შეწყვეტა.

შეხვედრასთან დაკავშირებით „ახალგაზრდა იურისტთა ასოციაციის“ ხელმძღვანელმა სულხან სალაძემ განაცხადა, რომ ამ შეხვედრაზე მნიშვნელოვანი დეტალები გაჟღერდა, თუმცა ისინი არ დაუკონკრეტებია.

„შევთავაზე, რომ საია გარკვეული ტიპის ინფორმაციის გადამოწმებას შეეცდება. ჩვენ სახელმწიფო დაწესებულებებს მივმართავთ დამატებითი ინფორმაციისთვის. გარკვეული მიზეზების გამო ახლა ამ ინფორმაციაზე არ ვისაუბრებ. ამ ინფორმაციის მიღება გარკვეულ სურათს დაგვანახებს, თუ რასთან გვაქვს საქმე. თავის მხრივ, არხის წარმომადგენლებმა ისაუბრეს იმაზე, თუ რა მდგომარეობაა ტელევიზიაში. თუ რამდენად რთულია მათთვის ამ პირობებში მუშაობა", - განაცხადა სალაძემ და აღნიშნა, რომ, როცა საუბარია მედიაზე, ხელისუფლებამ, ბიზნესმა, ყველამ უნდა გადადგას შემხვედრი ნაბიჯები და ეს ნაბიჯები უნდა იდგმებოდეს ისე, რომ წინასაარჩევნო პერიოდში მედიის დაზიანება არ მოჰყვეს.

7 სექტემბერს არხის ჟურნალისტებმა საგანგებო განცხადება გაავრცელეს, რომელშიც აღნიშნულია, რომ ხელისუფლებამ „იბერიას“ გადაუკეტა დაფინანსების მთავარი წყარო. კერძოდ, კომპანია ,,ომეგა ჯგუფი“, რომლის შემადგენლობაშიც შედის ტელეკომპანია ,,იბერია“, პარალიზებულია. ტელეკომპანიის განცხადებით, ხელისუფლებამ წარმოება მიზანმიმართულად გააჩერა.