პოლიტიკა

საია შსს-ის „პერსონალური მონაცემების შესახებ“ კანონის დარღვევაში ადანაშაულებს

ორგანიზაცია „ახალგაზრდა იურისტთა ასოციაცია“ შინაგან საქმეთა სამინისტროს „პერსონალური მონაცემების შესახებ“ კანონის დარღვევაში ადანაშაულებს.

საქმე ეხება უწყების განცხადებას, რომელშიც სოფელ ქისტაურში ჩატარებული საგამოძიებო მოქმედებებთან დაკავშირებით დეტალურადაა აღწერილი მოქალაქე თ.შ-ის ჯანმრთელობის მდგომარეობა.

საიას თქმით, არ არსებობდა ჯანმრთელობის შესახებ ინფორმაციის გასაჯაროების საჭიროება.

„პერსონალურ მონაცემთა დაცვის შესახებ“ საქართველოს კანონის თანახმად, პირის ჯანმრთელობის მდგომარეობის შესახებ ინფორმაცია არის განსაკუთრებული კატეგორიის პერსონალური მონაცემი, რომელთა დამუშავებისთვისაც კანონი განსაზღვრავს მაღალ სტანდარტს. ჯანმრთელობის მდგომარეობის შესახებ ცნობებს ასევე სპეციალურ/განსაკუთრებულ კატეგორიად აღიარებს ევროპის საბჭოს კონვენცია „პერსონალური მონაცემების ავტომატური დამუშავებისას ფიზიკური პირების დაცვის შესახებ“. შესაბამისად, განსაკუთრებული კატეგორიის პერსონალური მონაცემები უნდა დამუშავდეს მხოლოდ კანონით განსაზღვრულ გამონაკლის შემთხვევებში. მოცემულ საქმეში არ იკვეთება კანონით გათვალისწინებული გამონაკლისები (მაგალითად, მონაცემთა სუბიექტის წერილობითი თანხმობა), რაც ინფორმაციის დამუშავების ლეგიტიმურობაზე მიუთითებდა.

მართალია, ობიექტური გამოძიებისათვის აუცილებელია ყველა მნიშვნელოვანი ინფორმაციის შესწავლა, თუმცა, მიგვაჩნია, რომ სამინისტროს მხრიდან მოცემულ საქმეში პირის ჯანმრთელობის მდგომარეობის შესახებ ინფორმაციის გასაჯაროების საჭიროება არ არსებობდა. საქმისადმი მაღალი საჯარო ინტერესის არსებობის შემთხვევაშიც, სამინისტროს მხრიდან პირის ჯანმრთელობის მდგომარეობის შესახებ ზოგადი ინფორმაციის გამჟღავნება, კონკრეტული დაავადებისა თუ სამედიცინო პრობლემის მითითების გარეშე, საკმარისი იქნებოდა საზოგადოების ინფორმირების მიზნით“, -ნათქვამია განცხადებაში.

„საია“-მ მოუწოდა შსს-ს, კანონის შესაბამისად და ყურადღებით მოეკიდოს განსაკუთრებული კატეგორიის პერსონალური მონაცემების, კერძოდ, პირის ჯანმრთელობის მდგომარეობის შესახებ ცნობების დამუშავებასა და გასაჯაროებას.

ორგანიზაციამ ასევე მიმართა პერსონალურ მონაცემთა დაცვის ინსპექტორს და მოუწოდა, შეისწავლოს აღნიშნული შემთხვევა და გამოიყენოს „პერსონალურ მონაცემთა დაცვის შესახებ“ კანონით გათვალისწინებული სანქციები.

ანა მებურიშვილი